DILI, 14 Jullu 2026 (TATOLI)—Ministru Juventude, Desportu, Arte no Kultura, Nelyo Isaac Sarmento, hateten Governu liuhusi enkontru ministeriál ho Ministériu Defeza hodi deside katak Governu sei selebra loron Forças Armadas da Libertação Nacional de Timor-Leste (FALINTIL) ba iha Foho Matebian.
“Objetivu halo iha foho Matebian tamba atu rezerva istória luta nian, tuir istória kuazé ema barak mak mate iha ne’ebá hafoin inimigu sira lansa bombardeiru, entaun rai hakoi ema ho moris de’it (kubur hidup-hidup) no to’o agora seidauk hetan sira-nia restu mortais,” Ministru Juventude, Desportu, Arte no Kultura, Nelyo Isaac Sarmento, hateten ba jornalista sira iha Sentru Konvensaun Dili (CCD, sigla portugés), Kaikoli, ohin.
Governante ne’e dehan, agora tenke hametin komprovasaun unidu ba jerasaun sira tuir mai ne’ebé dalaruma haluha tiha istória sira-ne’e, entaun Xefe Estadu Maior Jenerál F-FDTL, Tenente Domingos Raul “Falur Rate Laek”, fó hanoin ba Governu atu selebra loron nasional ne’e iha foho Matebian.
“Iha atividade ne’e MJDAK hamutuk ho MAKLAN sei responsabiliza kona-ba asuntu kulturál mak sei bolu lia-na’in sira hodi halo rituál espesiál no sei iha mós juramentu interna entre forsa sira husi ofisiál hotu-hotu (defeza) iha foho Matebian,” nia dehan.
Tuir nia, familia matebian sira la ezije buat ida maibé tuir Timor-Leste nia tradisaun ne’e tenke perzerva hodi halo serimónia kulturál ruma antes komemora loron FALINTIL ne’e.
“Tuir ita-nia tradisaun ita tenke prezerva ka halo seremónia kulturál ruma atu ba oin forsa armada sira bele hatene oinsá asume sira-nia kna’ar hodi serbí de’it ba povu iha rai ida-ne’e no laiha tan inimigu (odiu) entre forsa armada sira,” nia hateten.
Aleinde ne’e, populasaun sira-ne’ebe hela besik iha Foho Matebian hanesan husi Laga, Kelikai, Uatukarbau, Baguia no seluk tan ne’e sei marka prezensa iha komemorasaun loron FALINTIL iha tinan 2026 ne’e.
Jornalista : Alexandra da Costa
Editór : Cancio Ximenes
