Kandidatu estudante na’in-63 Akademia Militár Konjunta hakat ba teste aptidaun
DILI, 14 Jullu 2026 (TATOLI)—Kandidatu estudante hamutuk na’in-63 ba Akademia Militár Konjunta hakat ba teste aptidaun militár.
Prezidente Komisaun Rekrutamentu ba kandidatu estudante Akademia Militár 2026, Nuno Manuel Corvelo, hateten, teste aptidaun fíziku, teste saúde no psikoteste realiza ho di’ak maibé iha kandidatu estudante barak mak lakon iha faze ne’e. Daudaun ne’e to’o iha faze aptidaun militár.
“Rezultadu Akademia Militár ne’e konta teste ida foin daudaun ne’e sira konklui ona, liuliu teste ikus liu ne’e iha ema na’in-63 mak sei iha ne’ebá. Iha barak mós la liu iha teste fíziku, teste saúde no prova orál. Tanba siénsia ne’e ita foti barak ein bora husi siénsia ezata de’it. Tanba ne’e mak barak mak la konsege,” Nuno Corvelo hato’o ba jornalista sira iha Muzeu Rezisténsia, Tersa ne’e.
Notísia relevante :Aplikante na’in-214 Akademia Militár Konjunta 2026 partisipa iha prova kulturál
Nia esplika, kandidatu estudante ne’ebé admitidu sei dezloka ba edifísiu Akademia Militár Konjuta iha Aileu durante loron-10.
Durante teste aptidaun militár kandidatu sira sei adapta-an ba natureza militár, kuandu iha teste mak kandidatu sira la kumpre ba regulamentu vida militár mak sei halo eleminasaun.
“Kuandu sira liu faze ne’e, entaun ita admite sira hodi koñese kle’an liután akademia konsulta ba fulan hira tan no tinan oin sira hahú halo eskola,” nia katak.
Jornalista : Natalino Costa
Editora : Julia Chatarina
