OEKUSI, 14 Jullu 2026 (TATOLI) – Embaixadora Boa-Vontade ba Asuntu Edukasaun iha Timor-Leste, Kirsty Sword Gusmão, segunda ne’e, oferese apoiu hanesan fasilidade informátika sira hanesan komputadór, mákina impresora no mobiliáriu sira kompostu husi meza no kadeira atu reforsa prosesu aprendizajén Eskola Bázika Filiál (EBF,) 1,2,3 Nefomtasa iha suku suku Ban-Afi sub-rejiaun Nítibe Rejiaun Administrativa Espesiál Oekusi Ambeno (RAEOA).
“Apoia ne’e mai husi Embaixadó
ra Boa-Vontade ba Asuntu Edukasaun hamutuk ho Primeiru-Ministru, tanba antes ne’e Embaixadora hala’o ona vizita hodi observa direita kondisaun eskola EBF Nefomtasa,” Diretór Rejionál Serbisu Edukasaun Oekusi, Vincêncio Cono informa, ba Ajénsia TATOLI,I.P iha Oekusi, ohin.
Notísia relevante:Kirsty Gusmão: Hadomi ki’ikoan sira nu’udar futuru nasaun nian
Dirijente edukasaun ne’e esplika katak fasilidade sira-ne’ebé eskola simu maka hanesan kadeira meza unidade 200, laptop unidade 20, mákina impresora (printer) unidade rua, no komputadór unidade rua.
Autoridade ne’e hateten, apoia hirak-ne’e entrega direita ba dirijente eskola EBF 1,2,3 Nefomtasa hodi responde ba nesesidade estabelesimentu ensinu nian, tanba antes ne’e diirijente eskola sira maka hato’o proposta iha loron 04 Juñu liubá, tanba preokupasaun ne’ebé eskola enfrenta iha tempu ezame tinan barak ona.
“Fasilidade sira-ne’e sei ajuda tebes nesesidade eskola hodi fasilita ba prosesu aprendizajén, hanesan komputadór bele asesu ona ho dijitál no serbisu administrasaun eskola nian, nune’e mós kadeira meza bele fasilita estudante sir abele utiliza ho séguru, tanba antes bele la sufisiénte,” nia informa.
Notísia relevante:Kirsty Gusmão: dezafiu foun ba Timor-Leste mak hamutuk liberta povu husi ki’ak
Entretantu, totál estudante ne’ebé dadaun hala’o hela estudu iha eskola EBF 1,2,3 Nefomtasa hamutuk na’in-125 ho profesór na’in-hitu.
Jornalista: Abílio Elo Nini
Editór: Rafael Ximenes de A. Belo
