OJE 2026: MJDAK ezekuta ona 50%
DILI, 14 Jullu 2026 (TATOLI)—Ministériu Juventude, Desportu no Arte Kultura (MJDAK), hahú husi Janeiru to’o Jullu 2026, ezekuta ona 50% husi Orsamentu Jerál Estadu (OJE) 2026 ne’ebé aloka ba MJDAK hamutuk $11.858.436.
Ministru Juventude, Desportu no Arte Kultura, Nelyo Isaac Sarmento, hateten ezekusaun OJE iha trimestre dahuluk sira iha difikuldade atu adota ho sistema aprovizionamentu foun ne’ebé Ministériu Finansa estabelese.
“Entaun sira-ne’ebé servisu iha área finana ne’e tenke adapta ho sistema ne’ebé Governu kria foun. Maibé iha trimestre daruak nian, ami toman tiha ona sistema aprovizionamentu tanba iha formasaun lubuk ida husi Ministériu Finansa ne’ebé bele fasilita ami,” Ministru Nelyo Isaac informa ba jornalista sira iha CCD Kaikoli, ohin.
Governante ne’e dehan, sira-nia ezekusaun tuir programa kalendáriu ne’ebé sira implementa kuazé 40% liu iha fulan-Janeiru to’o fulan-Jullu no nia fiar katak iha trimestre datoluk bele atinje to’o 50%-resin.
“Ezekusaun hirak ne’e kompostu husi programa juventude no desportu. Iha programa juventude hanesan ita apoiu ba sentru juventude, iha programa desportu foka ba kompetisaun desportu, liga futeból, voleiból, basketból no jogu komunitária,” nia relata.
Seluk tan, nia informa, ba programa infraestrutura mak ba kampu jogu desportivu nian maske prosesu konstrusaun balun la’o tarde tamba kapasidade husi kompañia nian, entaun difikulta ba sira-nia ezekusaun.
Programa seluk mak manutensaun ba fasilidade sira no programa preparasaun ba ASEAN Games 2027.
Aleinde ne’e, tuir nia, iha tinan ida-ne’e MJDAK sei realiza atividade rua mak hanesan festivál desportu entre ensinu superiór sira no ida seluk mak festivál desportu nasionál ne’ebé sei envolve husi munisípiu sira hotu.
“Ami halo ona aprosimasaun ho autoridade munisipál sira atu prepara sira-nia atleta hodi partisipa iha eventu ne’e iha Dili,” nia dehan.
Jornalista : Alexandra da Costa
Editór : Cancio Ximenes
