BOBONARU, 14 Jullu 2026 (TATOLI) – Komandu Polísia Munisípiu Bobonaru rejeita no konsidera informasaun falsa ne’ebé virál iha rede sosiál, ne’ebé akuza membru Polísia Tránzitu (Poltranz), ajente prinsipál inisiál LGL, halo pasa-revista ilegál iha Dili hodi apreende komunidade nia motorizada no entrega fali ba nia feen-ki’ik uza ne’e la loos.
Komandante Polísia Munisípiu Bobonaru, Superintedente Xefe Damião da Silva Correia, hateten katak komandu bolu ona ajente ne’e no nia justifika katak la halo aktu ilegál ne’e.
“Ha’u hakarak counter informasaun iha dia 17 Maiu 2026 iha Facebook katak membru Tránzitu Munisípiu Bobonaru partisipa kursu iha sentru formasaun halo cek point, apreende motór ida, lori fali bá fó nia feen segunda uza ne’e laloos. Ha’u hakarak hateten katak membru ida-ne’e inosente”, Damião informa tersa-feira ne’e.
Nia esplika katak komandu orienta ona ajente LGL hato’o keixa ba Diresaun Justisa Nasionál Komandu Jerál Polísia Nasionál Timor-Leste (PNTL), tanba iha indísiu membru polísia balun mak lansa informasaun ne’e.
Komandante ne’e afirma katak bainhira indentifika ema ne’ebé lansa informasaun referida, komandu sei foti asaun no prosesa tuir lei ne’ebé vigora.
“Balun ne’ebé halo voice, polísia tenke prosesa para halo kapturasaun ba nia. Iha indísiu katak membru Polísia balun mak halo ida-ne’e. Liuhusi voice IT sira identifika númeru telefone ne’ebé utiliza pasa informasaun falsa halo voice ne’e”, nia dehan.
Antigu Komandante Unidade Espesiál Polísia (UEP) ne’e husu ba públika atu labele konsumu informasaun ne’e, tanba konsidera katak postajen ne’e husi ema irresponsavel ne’ebé hakarak hatún dignidade pesoál no instituisaun PNTL.
Notísia relevante: DNTT Bobonaru no PNTL husu komunidade aumenta disiplina iha estrada hodi redús asidente
“Komentáriu balun dehan polísia halo kobransa ilegál liuhusi cek point para bele hatama osan ne’e bolsu, ne’e laloos. Ha’u bolu ona mai, em nome Komandu Munisípiu Bobonaru, hakarak hateten ba maluk sira sivíl tantu militár labele konsumu informasaun falsa. Karik iha indísiu, imi aprezenta keixa para bele prosesa, maibé labele kondena falsa, bele estraga ema balun ne’ebé la sala”, nia dehan.
Notísia relevante: PNTL Bobonaru rejista asidente tráfegu 42 inklui na’in-tolu lakon vida
Jornalista: Sergio da Cruz
Editora: Maria Auxiliadora
