BOBONARU, 14 Jullu 2026 (TATOLI)-Empreza lokál Bia Basan Mogen Unipessoal Lda., kontinua projetu konstrusaun irrigasaun Genumatan, iha suku Ritbou, postu administrativu Maliana, munisípiu Bobonaru, hafoin agrikultór sira kolleta haree epoka dahuluk tinan 2025-2026.
Obra ne’e konstrui ho orsamentu Planu Dezenlvolvimentu Integradu Munisipál (PDIM) tinan 2025 ho valór kontratu $229.429,35, hahú iha Abríl no remata Setembru 2025, maibé la konsege finaliza iha tinan kotuk no estende hodi fó biban ba empreza atu konklui iha tinan ne’e.
Jerente empreza Bia Basan Mogen Unipessoal Lda., Onivio Gonçalves, dehan projetu ne’e tuir loloos entrega ba Autoridade Munisípiu Bobonaru iha tinan kotuk, maibé la konsege tanba agrikultór sira seidauk kolleta hare no kondisaun klima mós la permite atu halo mobilizasaun materiál ba lokál projetu.
Nia dehan progresu fíziku atinje ona 80% no daudaun ne’e empreza prepara atu aselera serbisu hodi finaliza iha fulan-Agostu ne’e, tanba falta de’it ona konstrusaun bee-dalan metru 150, konstrusaun intek II no finalizasaun ba intek I.
Notísia relevante: Autoridade Ritabou husu aselera projetu irrigasaun Genumatan
“Ita presiza halo finalizasaun iha intek bee-matan ne’ebá, presiza finaliza eskada balun. Ita cor nia okos ne’e para asegura bee labele kee fali rai halo ku’ak. Depois irrigasaun ne’e kuaze kilómetru ida liu, falta de’it metru 150 mak ita seidauk konstrui. Intek II mós seidauk halo, más tinan ida-ne’e tarde liu fulan rua ita finaliza. Kompañia garante katak tarde liu iha inísiu Agostu bele ramata”, nia informa ba jornalista sira iha tersa-feira ne’e.
Xefe suku Ritabou, Maximiano dos Santos Araújo, rekomenda ba kompañia atu aselera serbisu tanba tempu bailoro laiha ona difikuldade kona-ba mobilizasaun materiál ba lokál projetu.
“Agrikultór sira kolleta hotu ona hare, depois bee-moos hasai hotu ona ba mota para halo bee-dalan ne’e maran para kareta bele mobiliza fatuk, rai-henek, simentu no seluk tan hodi kontinua irrigasaun ne’e to’o finaliza”, nia dehan.
Autoridade Munisípiu Bobonaru deside konstrui irrigasaun atu fasilita agrikultór sira hasa’e produsaun hare hodi responde ba nesesidade doméstika Bobonaru nian no irrigasaun ne’e sei fornese bee ba natar pur volta ektare 400-resin.
Notísia relevante: AMB ameasa atu hapara kontratu empreza konstrutora irrigasaun Genumatan
Jornalista: Sergio da Cruz
Editora: Maria Auxiliadora
