DILI, 15 Jullu 2026 (TATOLI)—Selesaun nasionál España halakon selesaun nasionál Fransa 2-0 iha semi-finál Kopa Mundiál 2026 hodi hakat ba final. Jogu Fransa kontra España ne’e realiza iha Estádiu Dallas, Arlington, Kuarta (15 Jullu 2026) madrugada oras Timor-Leste
Golu sira España nian prodús husi penalidade ne’ebé ezekuta husi Mikel Oyarzabal iha minutu 22 no situasaun jogu abertu Pedro Porro nian iha minutu 58.
Bainhira jogu hahú ekipa rua lansa kedan kontra-atake ba malu tuir tékniku no abilidade ida-idak nian. España domina bola ho meiu tiki-taka halo Fransa susar atu kombate.
Fransa utiliza joga nakloke, ka suta bola aas, maibé avansadu Kilian Mbappe labele liu tanba defeza España metin tebes.
Ho jogu ne’ebé kualidade no kakutak matenek, España hetan suta livre iha área penalidade fransés nia oin hafoin Adrien Rabiot sama Dani Olmo nia ain. Alex Baena nia suta kona parede.
To’o minutu 15, España kontinua domina. Entretantu, Fransa konsege halo estragu ba defeza españól iha kontra-atake.
España hetan penalidade ida hafoin Lucas Digne halo falta ba Lamine Yamal. Mikel Oyarzabal hakat ba oin hodi foti penalidade no lori España ba vantajen 1-0 iha minutu 22.
Fransa lakon William Saliba iha minutu 30. Nia hetan troka husi Maxence Lacroix tanba kanek iha ain-isin. Fransa luta atu harii atake sira maibé ekipa Didier Deschamps nian rekorre ba pasajen aas sira. Bainhira jogu primeira parte termina España provizóriu lidera jogu 1-0.
Tama ba segunda parte Fransa buka meiu hotu oinsá hamate jogu España nian, maibé España joga ho matenek halo Fransa book an ladi’ak husi minutu ba minutu.
España aumenta tan vantajen ba 2-0 iha segunda parte iha minutu 58. Pedro Porro marka golu hafoin Dani Olmo monu no bola halai ba kaixa penalidade Pedro mós lansa sutu halo guarda-rede Fransa labele salva.
Jogu sai manas liu, Lamine Yamal halo golu ida ba España iha minutu 60. Golu ne’e depois árbitru deside la permite tanba offside.
Fransa halo presaun ba España. Ekipa Luis de La Fuente nian tenke nakonu iha kaixa penalidade nian hodi konten atake sira.
Ferran Torres, ne’ebé maka iha de’it kampu durante minutu haat, besik atu halakon impase. Kabesa jogadór Barcelona nian la’o dook de’it hosi baliza Mike Maignan nian.
Fransa la konsege marka golu to’o árbitru lian dahikus nian. España konsege mantein nia vantajen 2-0 to’o ramata.
Alineasaun jogadór
Fransa: Maignan, Kounde, Upamecano, Saliba (Lacroix 30′), Digne (Theo Hernandez 72′), Tchouameni, Rabiot (Kone 46′), Dembele, Olise (Cherki 72′), Barcola (Doue 57′), Mbappé.
España: Simon, Pedro Porro, Cubarsi, Laporte (Llorente 84′), Cucurella, Rodri, Ruiz (Pedri 77′), Lamine Yamal, Dani Olmo (Merino 77′), Baena (Nico 84′), Oyarzabal (Ferran Torres 74′).
Jornalista : Hortêncio Sanchez
Editór : Cancio Ximenes
