Komisaun E rona preokupasaun APORTIL kona-ba kondisaun ró Berlin Nakroma no Ramelau
DILI, 15 Jullu 2026 (TATOLI) – Autoridade Portuária Timor-Leste (APORTIL) Institutu Públiku hasoru malu ho Komisaun E ne’ebé trata Asuntu Infraestrutura iha Parlamentu Nasionál hodi hato’o preokupasaun sira kona-ba kondisaun iha ró Berlin Nakroma no Ramelau.
Prezidente Komisaun E, Marcos Xavier, hateten audiénsia ne’e halo ho objetivu tanba foin lalais Komisaun hala’o fiskalizasaun bá iha Ataúru no aproveita haree kondisaun ró rua ne’e presiza duni hetan atensaun.
Tuir nia, kondisaun iha ró laran ár kondisionadu (AC) la funsiona, kadeira balun ladún di’ak, hariis-fatin komesa aat no la seguru ba pasajeiru sira.
Ho ida-ne’e, Komisaun haree iha Orsamentu Jerál Estadu (OJE) 2027 bele prevee ba manutensaun, maski manutensaun ró kada tinan halo, maibé tenke inklui preokupasaun ne’ebé iha.
“Ohin, Diretór Navegasaun lori sira-nia relatóriu kona-ba kondisaun ró rua ne’e fó iha Komisaun atu iha koñesimentu molok ba OJE 2027”, nia hateten hafoin ramata audiénsia iha Parlamentu, ohin.
Komisaun sei fó rekomendasaun ba Ministériu Transporte no Komunikasaun (MTK), tanba APORTIL tuleta ba instituisaun ne’e hodi tau planu iha orsamentu ba tinan oin.
Nia dehan, durante fiskalizasaun, haree kondisaun ne’ebé iha difikulta mós pasajeiru sira barak lakohi tuur iha ró laran, tanba manas.
Jornalista: Nelson de Sousa
Editora: Maria Auxiliadora
