BOBONARU, 15 Jullu 2026 (TATOLI)-Komunidade iha suku Tapo, postu administrativu Bobonaru, husu ba Governu atu halo melloramentu ba sistema bee-moos, tanba kanu distribuisaun maioria aat ona, ferrujen no hetan estraga husi asaun ema deskoñesidu.
Reprezentante komunidade Tapo, Jacinto Espírito Santo Barros, hateten katak durante tempu bailoro, susar tebes atu asesu ba bee-moos tanba distribuisaun bee husi bee-matan Ilmuku, Tapo, la sufisiente tanba bee-sai iha dalan-dalan.
“Bee sai duni, más kanu sira sobu. Iha leten sira losu tiha ami-nia bee la mai, kanu halo ku’ak iha dalan-dalan. Ami hanoin mak besi ne’e tenke troka. Bailoro ne’e ami povu hola bee iha ne’ebé, depois ema fa’an bee tanke ida $40, ami labele sosa ida”, nia dehan ba Tatoli, ohin.
Xefe suku Lourba, Lino da Cruz, mós husu ba Governu atu tau prioridade ba problema ne’e, tanba sistema bee-moos iha Tapo instala liu tinan 20, maibé seidauk hetan reabilitasaun.
Nia haktuir katak kada tinan tama iha tempu bailoro, komunidade Lourba no suku Malilait, Ilat-laun, no seluk tan sempre enfrenta problema falta bee-moos.
Lino da Cruz rekomenda mós ba Governu atu aumenta funsionáriu no operadór sistema hodi bele halo kontrolu regular iha terrenu, tanba Grupu Maneja Fasilidade (GMF) ne’ebé forma la funsiona ho di’ak.
“Ema serbisu voluntáriu ne’e dalaruma ami tun hotu mak sira bá. Atu bá mesak ne’e la bá ida, tanba sira uza rasik sira-nia motór. Funsionariu ne’e Governu rekruta bele to’o na’in-lima ou neen, agora ida de’it oinsá sira atu kontrola”, nia dehan.
Bee-Matan iha Tapo fornese bee ba populasaun iha suku sira hanesan Bobonaru Vila, Ai-Asa, Malilait, Lourba no suku balun iha komplex Marobo hanesan Ilat-laun no seluk tan.
Antes ne’e Governu halo ona melloramemtu ba sistema bee-moos urbana iha postu Maliana, Kailaku, Balibó, Atabae no Lolotoe, falta postu Bobonaru ne’ebé fonte bee mai husi suku Tapo.
Jornalista: Sergio da Cruz
Editora: Maria Auxiliadora
