DILI, 15 Jullu 2026 (TATOLI)-Prezidente Parlamentu Nasionál (PPN), Maria Fernanda Lay, sei partisipa reuniaun ba sesaun da-15 Asembleia Parlamentár Komunidade País Ko’alia Lia-Portugés (CPLP, sigla portugés) iha Luanda, Angola, ne’ebé sei realiza iha loron 22 to’o 24 Jullu tinan ne’e.
Eventu ne’e sei reúne Parlamentu hotu iha país membru CPLP hodi diskute kona-ba konsolidasaun governasaun demokrátika no seguransa ne’ebé ho tema “Seguransa no Integrasaun entre Estadu membru; Kestaun mobilidade no governasaun; Fortalesimentu diplomásia parlamentár”.
Reuniaun ne’e mós aborda aspetu hanesan integridade, estabilidade institusionál, ba reforsa kooperasaun interparlamentár.
Eventu ne’e ho lema “Luanda, kapitál Diálogu Parlamentár ba CPLP ida Demokrátika liu, Seguru no Reziliente”.
Maria Fernanda Lay dehan fórum ne’e importante hanesan meiu ida diskute polítika iha área oioin entre Parlamentu sira. PPN iha sesaun ne’e sei hato’o mós diskursu ne’ebé foka liubá país nia partisipasaun iha mundu globál, pozisaun ba situasaun iha Giné-Bisau, partilla kona-ba pás no dezenvolvimentu.
Nia espera lian Timor-Leste nian iha CPLP rona hodi rezolve situasaun iha Giné-Bisau. “[Tanba ne’e,] ha’u sei bá Angola iha dia 20 Jullu. Desta vez ita prezide CPLP”, nia hateten ba Tatoli, iha Parlamentu, ohin.
Eventu ne’e sei partisipa husi deputadu 100, observadór asosiadu, jornalista no diplomata CPLP. Sei iha mós reuniaun delegasaun parlamentár Estadu-membru hodi analiza matéria interese komún.
Programa ne’e inlkui reuniaun konferénsia Prezidente Parlamentu Nasionál, rede feto parlamentár no komisaun permanente Asembleia Parlamentár CPLP.
Asembleia Parlamentár CPLP nu’udar órgaun ne’ebé reúne reprezentasaun Parlamentu husi Estadu-membru hotu ne’ebé harii iha tinan 2007, ho objetivu promove ideia komunitáriu liuhusi diálogu, fortalesimentu demokrasia, direitu umanu no kooperasaun interparlamentár.
Asembleia Parlamentár CPLP kompostu husi Estadu-membru sia hanesan Angola, Brazíl, Kabuverde, Giné-Bisau, Giné Ekuatoriál, Portugál, Saun Tomé no Prínsipe, Mosambike no Timor-Leste.
Jornalista: Nelson de Sousa
Editora: Maria Auxiliadora
