DILI, 15 Jullu 2026 (TATOLI) – Senadór Repúblika Indonézia husi Provínsia Bali, Shri I Gusti Ngurah Arya Wedakarna Mahendradatta Wedasteraputra Suyasa, konvida Prezidente Repúblika Timor-Leste, José Ramos-Horta, atu partisipa iha abertura Bali-Timor-Leste Business Forum, ne’ebé planeia atu realiza iha Agostu ka Setembru 2026 iha Bali.
Arya Wedakarna hateten katak fórum ne’e sei fó oportunidade atu hametin relasaun entre povu rua (people-to-people connection), nomós haburas kooperasaun iha área ekonomia, edukasaun, turizmu no investimentu, liuliu bainhira Timor-Leste ne’ebé daudaun tama ona hanesan membru ASEAN.
“Ami ohin entrega ona konvite ofisiál katak husi Bali sei organiza Bali–Timor-Leste Business Forum atu hametin people-to-people connection. Ami hakarak iha atividade konkreta ida hodi simu Timor-Leste hanesan membru ASEAN”, Arya Wedakarna hateten ba jornalista sira hafoin hasoru Prezidente, iha Palásiu Prezidénsial Bairu Pité, Dili, ohin.
Tuir nia, relasaun entre Bali no Timor-Leste kontinua dezenvolve di’ak. Tinan ida, liu ema rihun 100 husi Timor-Leste vizita Bali, no agora iha estudante timoroan liu 500 ne’ebé kontinua estuda iha programa lisensiatura (S1) no mestradu (S2) iha universidade sira iha Bali.
Nia haree katak oportunidade kooperasaun entre Bali no Timor-Leste la limita de’it ba edukasaun no turizmu, maibé bele mós estende ba setór negósiu no investimentu seluk.
Iha nia vizita iha Dili, Arya Wedakarna lori delegasaun ida ne’ebé kompostu husi reprezentante Asosiasaun Spa Indonézia (ASPi), asosiasaun otél, asosiasaun propriedade, emprezáriu turizmu, emprezáriu kafé, akadémiku husi Universidade Mahendradatta, no reprezentante Muzeu Soekarno.
Nia hateten katak prezensa delegasaun negósiu sira ne’e hatudu kompromisu atu harii kooperasaun ekonomika ne’ebé maka’as liután entre Bali no Timor-Leste.
“Enkontru ohin efetivu loos. Ami hein katak iha fulan sira oin mai, ami bele simu Prezidente Timor-Leste iha Bali atu marka abertura eventu ne’e. Maibé, data loloos ba realizasaun fórum ne’e sei ajusta ho ajenda Prezidente Ramos-Horta nian”, nia dehan.
Aleinde kooperasaun ekonómika, Arya Wedakarna mós hato’o apresiasaun ba lideransa Prezidente Ramos-Horta. Tuir nia, Prezidente Timor-Leste la’ós de’it líder polítiku, maibé mós figura ida ne’ebé unifika povu, ema ne’ebé simu Prémiu Nobel ba Pás no personalidade espirituál ida ne’ebé respeitadu iha Bali.
Nia akrexenta katak iha emprezáriu no diretór-ezekutivu empreza hamutuk besik 500 husi Bali no Indonézia ne’ebé prontu atu hasoru Ramos-Horta iha fórum ne’e hodi buka oportunidade kooperasaun foun entre parte rua.
“Ami haree nia hanesan aman ida. Tanba ne’e, ami hakarak simu nia ho di’ak iha Bali hamutuk ho diáspora Timor-Leste, juventude Bali, emprezáriu sira no parseiru hothotu”, Arya Wedakarna salienta.
Jornalista: Arminda Fonseca
Editora: Maria Auxiliadora
