DILI, 16 Jullu 2026 (TATOLI)—Autoridade Inspesaun Fiskalizasaun Atividade Ekonómika no Sanitária Alimentár (AIFAESA, sigla portugés) halo avaliasaun trimestrál daruak 2026 hodi identifika progresu no difikuldade durante ne’e hala’o servisu liuliu atividade inspesaun iha terrenu.
Inspetora Jerál Autoridade Inspesaun Fiskalizasaun Atividade Ekonómika no Sanitária Alimentár (AIFAESA, sigla portugés), Odete Maria Viegas, informa iha Janeiru to’o Juñu 2026, AIFAESA halo inspesaun ba fatin estabelesimentu sira (operadór ekonómika) iha kapitál nomós iha teritórriu hamutuk 5.000 no rekolla koima $436.000.
“Iha operadór ekonómiku balun mak selu infrasaun ho voluntariamente maibé balun hakarak prosesa tuir lei, entaun tenke submete ba Ministériu Públiku. Tanba ne’e, husu nafatin ba operadór ekonómiku sira katak sensibilizasaun no divulgasaun informasaun ne’ebé ekipa AIFAESA halo ne’e hodi redús infrasaun atu labele prejudika ba sira-nia negósiu,” Inspetora Jerál AIFAESA informa ba jornalista sira iha nia kna’ar fatin Matadoru, ohin.
Iha trimestre datoluk, nia dehan, AIFAESA sei kontinua halo reinspesaun ba munisípiu sira-ne’ebé antes ne’e sira halo tiha ona inspesaun, no sei halua kobertura ba munisípiu ne’ebé seidauk halo inspesaun.
Tanba ne’e, nia mós rekomenda ba funsionáriu sira atu evita atitude komunikasaun hanesan ko’alia liafuan kro’at (tolok) maibé garante ambiente ne’ebé hakmatek (labele barullu), tenke koordena malu no tane metin profisionalizmu ba responsabilidade sira.
“Rekomendasaun husi husi funsionáriu sira kona-ba atitude internamentu ba institusionál tanba instituisaun públiku atu ervisu ba Governu no Estadu. Liuliu AIFAESA nia papel, atu halo prestasaun direta ba ita-nia populasaun liuliu ba operadór ekonómiku sira. Entaun, komportamentu sira mak sai xave,” nia dehan.
Jornalista : Alexandra da Costa
Editór : Cancio Ximenes
