SÃO TOMÉ e PRÍNCIPE, 16 Jullu 2026 (TATOLI) – Misaun Observasaun Eleitorál (MOE) g7+, Kinta ne’e, ofisialmente hahú ninia atividade iha São Tomé e Príncipe ho enkontru kortezia ho autoridade xave nasaun nian no reprezentante instituisaun sira ne’ebé envolve iha prosesu eleisaun prezidensiál, ne’ebé tuir kalendáriu sei realiza iha domingu, loron 19 fulan-Jullu.
Iha loron dahuluk, ekipa MOE g7+ ne’ebé lidera husi Komisáriu Floyd Oxley Sayor, hasoru malu ho Ministra Negósiu Estranjeiru, Kooperasaun no Komunidade, Ilza Amado Vaz; Primeiru-Ministru, Américo d’Oliveira dos Ramos; Prezidente Repúblika São Tomé e Príncipe, Carlos Manuel Vila Nova; Prezidente Komisaun Eleitorál Nasionál, Jeudiger de Nascimento, no reprezentante husi Organizasaun Naun Governamentál, Transparénsia Eleitorál São Tomé no Príncipe nian (TELECT-STP), Hernâni Santiago.
Xefe MOE g7+, Floyd Oxley Sayor, hatete iha enkontru ne’e aprezenta ba líder sira husi nasaun ne’e kona-ba mandatu misaun g7+ no reafirma kompromisu atu akompaña prosesu eleitorál ho independente, imparsiál, no objetivu, tuir prinsípiu observasaun eleitorál internasionál no lei São Tomé e Príncipe nian.
Tuir Floyd Oxley Sayor, autoridade sira hatudu vontade atu koopera ho misaun. “Autoridade São Tomé e Príncipe simu ami ho di’ak tebes. Iha enkontru kortezia ne’e ami aprezenta ba sira kona-ba misaun g7+ nian no esplika ba sira katak ami iha ne’e atu akompaña prosesu eleitorál. Prezidente Repúblika garante katak eleisaun sei la’o ho dame,” nia afirma.
Enkontru sira kobre mós preparasaun eleisaun nian, kapasidade instituisaun eleitorál sira, edukasaun sívika votante nian, transparénsia prosesu eleitorál, partisipasaun sidadaun nian, ho objetivu atu garante eleisaun sira ne’ebé livre, inkluzivu, demokrátiku, no kredivel.
Tuir dirijente ne’e, observasaun inisiál sira misaun nian haree katak ambiente polítiku iha São Tomé e Príncipe lao ho ambiente ne’ebé kalma. Liuliu bainhira akompaña no observa apoiantes husi kandidatu nain rua (Nito ho atuál Prezidente da Repúblika, Carlos Vila Nova) iha distritu Guadalupe, apoiante sira sempre halo atividade kampaña ho livre no laiha provokasaun ba malu.
“Ohin, ami observa atmosfera ne’ebé hakmatek, livre husi konfrontasaun sira. Ami haree atividade kampaña eleitorál balun no fiar iha ona kondisaun atu hatudu katak prosesu eleisaun ne’e la’o ho dame,” nia nota.
Iha fatin hanesan, Diretór Operasionál g7+, Felix Piedade, informa katak iha reuniaun ho Ilza Amado Vaz, atu atualiza de’it kona-ba rezultadu sira hosi Enkontru Ministeriál g7+ ba dala-6 ne’ebé hala’o ona iha tinan 2025, inklui estatutu hosi kontribuisaun Estadu-Membru sira no preparasaun sira ba Simeira Altu Nível organizasaun nian, ne’ebé sei realiza iha Setembru 2026 iha Nova Iorke, Estadus Unidus Amérika.
Tuir Felix Piedade, enkontru ne’e mós serve hodi atualiza ba Governu São Tomé e Príncipe kona-ba servisu organizasaun nian no sei konvida Ministra Ilza Vaz atu partisipa iha simeira ne’ebé sei halo iha Nova Iorke.
“Ami atualiza Ministru kona-ba preparativu sira ba Simeira Altu Nível g7+ nian, ne’ebé sei hala’o iha fulan-Setembru iha marjen reuniun Asembleia-Jerál Nasaun Unida nian. Ami sei haruka konvite ofisiál ida ba Governu São Tomé e Príncipe no hein katak sira bele partisipa ativa iah enkontru ne’e”, nia afirma.
Felix Piedade agrdaeese ba Governu São Tomé e Príncipe tanba simu delegasaun ne’e ho laran-haksolok no reafirma katak g7+ iha kompromisu atu hametin prinsípiu demokrátiku, Estadu direitu, no realizasaun eleisaun pasífika.
MOE g7+ mós hato’o ninia agradesimentu ba Governu, instituisaun eleitorál sira, no sosiedade sivíl São Tomé e Príncipe nian ba ospitalidade no kooperasaun ne’ebé hatudu dezde delegasaun ne’e to’o nasaun referidu.
Misaun ne’e lidera husi Komisáriu husi Komisaun Nasionál Eleisaun Libéria, Floyd Oxley Sayor, inklui Diretór Operasional g7+ Felix Piedade, Diretór-Jerál Sekretariadu Tékniku Administrasaun Eleitorál Timor-Leste, Elvino Moniz, no Ofisiál Protokolu no Parseria Sekretariadu g7+, Elísio Valadares.
Durante iha São Tomé e Príncipe, ekipa sei monitoriza faze hotu-hotu hosi prosesu eleitorál, hosi preparasaun pré-eleitorál to’o votasaun, kontajen votu, tabulasaun, no anúnsiu rezultadu sira.
Hafoin enkontru ne’e, Floyd Oxley Sayor afirma katak durante misaun g7+ nian iha São Tomé e Príncipe delegasaun sei monitoriza faze hotu-hotu hosi prosesu eleisaun prezidensiál hanesan preparasaun inisál to’o anúnsiu rezultadu finál, ho objetivu atu kontribui ba eleisaun ida ne’ebé transparente, pasífiku no kredível.
“Ami nia misaun mak atu observa atividade pré-eleisaun hotu-hotu, halo monitorizasaun ba votasaun, kontajen votu, no tabulasaun rezultadu, no sei mantein São Tomé e Príncipe to’o anunsia rezultadu finál,” nia dehan.
Notísia relevante: Ohin, ekipa g7+ dezloka ba São Tomé e Príncipe hodi observa eleisaun prezidensiál
Jornalista: Afonso do Rosário
Editora: Isaura Lemos de Deus
