DILI, 16 Jullu 2026 (TATOLI)—Ekipa Porto Taibesse FC susesu iha nia jornada daualu Liga Futeból Timorense bainhira manán nia adeversáriu Emmanuel FC ho golu úniku 1-0, iha jogu ne’ebé realiza iha Estádiu Munisipál Dili, kinta kalan.
Husi vitória ne’e lori Porto Taibessi hadi’a kedan nia pontu ba pontu sia hodi halai sa’e ba liña leten dook ona husi zona degradasaun.
Jogu hahú ho ritmu kalma. Emmanuel ho treinadór Gaspar Amaral, tama ho formasaun 4-3-3. Alex Gama iha lina oin, defiza lidera husi Tomas Sarmento no Israel Wamiau. Iha meiu kampu, Celestino Dos Reis tenta kontrola bola hamutuk ho Jimmi Mendonca no Fernando Mirin. Iha oin, Feliciano Da Costa no Jonata Pereira tenta fura defiza Porto.
Porto Taibessi ho treinadór Hengki Nogueira mós mai ho 4-3-3. Baptista Koren Ola iha lina oin, linha defeza haat (4) ho Aurio Da Costa, Carol Moreira, Daniel Appiah, no Claudio Martins, meiu kampu, Pascoal Ximenes, Jerico Piedade, no Mohammad Gaoshirowi. Atakante na’in-tolu, Lazio Piedadde, Mohammad Humdanji, noJardel Piedade.
Jogu la’o husi minutu ba minutu, jogadór parte rua ho formatu ne’ebé haneasan la fó pontu fraku ba malu, sira luta maibé seidauk bele rezulta golu.
Taibesse halo atake maka’as maibé sei salva husi Emmanuel ne’ebé nia defeza joga ho esperiensia no matenek. Sira vinga malu to’o apitu intervalu lian.
Tama ba segunda parte, ekipa rua kontinua atake malu ho tékniku no abilidade ne’ebé iha, maibé forsa nafatin hanesan. Emmanuel kontinua buka Porto nia frakeza atu nune’e bele ultrapasa defeza Porto hodi nune’e bele fura rede.
Porto la nonook, responde mós ho atake. Iha minutu 70 to’o ona iha tornu Porto nian, sira konsege domina bola no hetan kuak deeza Emmanuel nian.
Patricio da Silva hetan bola pasa husi nia kolega sira no fura rede Emmanuel muda rezultadu ba 1-0.
Banku Porto hotu haksolok. Patricio ne’ebé tama husi suplente sai figura jogu no muda rezultadu hodi hadau pontu tolu husi Emmanuel.
Minutu 71-90, Emmanuel tenta halo atake maka’as maibé Porto defende, hafoin sofre golu, Emmanuel tama ho forsa tomak. Nuncio Da Silva, Andenio Ximenes, no Armand Beaddound tama ba kaixa penalti Porto nian maibé defeza Porto metin. Jonata Pereira iha oportunidade sutu rua maibé guarda-rede Baptista Koren Ola salva.
Porto muda ba jogu defensivu. Juvencio Soares tama ba lina laran, Rui Abel no Danilo Alves ajuda defeza. Pascoal Ximenes no Jerico Piedade mantein iha meiu kampo.
Husi defensivu ne’e lori Porto manán duni basá apitu ikus lian tala jogu ho vitoria 1-0 ba Porto Taibesse.
Jornalista : Hortêncio Sanchez
Editór : Cancio Ximenes
