DILI,16 Jullu 2026 (TATOLI)-Primeiru-Ministru, Xanana Gusmão, relata kona-ba preparasaun Orsamentu Jerál Estadu (OJE) 2027 ba Prezidente Repúblika. José Ramos-Horta.
“Ha’u mai informa ba Prezidente katak ami iha atividade lubuk ida, ho ministériu ho institusaun sira hotu, atu temi karik dehan obriga to’o diretór sira hanoin bainhira atu halo orsamentu tenke ho vizaun ida klara ba iha futuru. La’e ita halo de’it, buat hotu la la’o ba oin”, Xanana Gusmão hateten iha Palásiu Prezidensiál, Bairu Pité, ohin.
Nia subliña importante tebes tenke iha vizaun klara, tanba iha 2024 Governu husu ba empreza ida hodi avalia kona-ba Planu Estratéjiku Dezenvolvimentu (PED) 2011-2023 nia progresu.
“Tanba iha 2000 ha’u la’o uitoan bá ASEAN ne’ebá governante sira iha ASEAN ninian dehan ba ha’u katak imi atu ukun-an, maibé bainhira imi ukun-an tenke iha vizaun ida longu prazu ninian. La’e partidu ida sa’e manán osan tun fali, partidu ida sa’e manán osan tun fali, maibé povu la sente di’ak”, nia dehan.
Tanba ida-ne’e mak halo tiha PED no halo avaliasaun indika katak iha infrastrutura balun di’ak, balun seidauk no seluk seidauk halo.
Tanba haree katak iha 2016 komunidade 23% seidauk asesu ba eletrisidade, mai fali 2023 mós nafatin, agora ne’e la’o daudaun ona tinan ida-ne’e aldeia hothotu sei hetan.
“Ha’u informa ba Prezidente ami halo buat barak, nomós informa katak ami haruka tiha ona ba Parlamentu Nasionál kona-ba ideia jerál ida ba estratéjka ba OJE 2027”, nia dehan.
Xanana salienta katak, iha Agostu, instituisaun hothotu tenke hatama ona planu OJE 2027, maibé tau prioridade polítika Governu nian iha 2027 no 2028, tanba sei iha eleisaun foun.
Lembra katak iha loron 08 Jullu 2026, Konsellu Ministru Governu aprova ona tetu indikativu ba Orsamentu Jerál Estadu 2027 hamutuk billaun $2,1.
Jornalista: Arminda Fonseca
Editora: Maria Auxiliadora
