Projetu Alargamentu Aeroportu: Governu konklui despeju administrativu ba uma-kain 57
DÍLI, 16 Jullu 2026 (TATOLI) – Ekipa konjunta ne’ebé kompostu husi Sekretáriu Estadu Asuntus Toponímia no Organizasaun Urbana (SEATOU), Administração de Aeroportos e Navegação Aérea de Timor-Leste, Empreza Públika (ANATL, E.P. – Sigla Portugés), Ministériu Obras Públikas (MOP), Ministériu Justisa liuhusi Direção Nasionál Terras no Propriedades (DNTP), Polísia Nasionál Timor-Leste (PNTL) no entidade relevante seluk, konklui ona prosesu despeju administrativu ba uma-kain 57 iha Aldeia Beto Tasi, Marinir, Suku Madohi, Postu Administrativu Dom Aleixo, Munisípiu Díli.
Medida ne’e realiza atu prepara área ba projetu alargamentu Aeroportu Internasionál Nicolau Lobato, Comoro.
“Obrigadu ba ekipa konjunta no PNTL, inklui Ministériu Obras Públikas ne’ebé uza ekipamentu pezadu ho susesu to’o oras tuku 4:00 lokraik,” Sekretáriu Estadu Asuntus Toponímia no Organizasaun Urbana, Germano Santa Brites Dias, ba jornalista sira iha Beto Tasi, Díli, Kinta ne’e.
Germano esplika katak Governu tuir ona prosedimentu legal hotu antes ezekuta despeju administrativu. Durante fulan tolu, ekipa konjunta halo levantamentu, fó notifikasaun ba komunidade no aumenta tan prazu loron 10 atu família sira bele hasai sira nia sasán no husik fatin.
Maibé, tanba balu la kumpri desizaun Estadu, Governu dehan katak obrigadu atu ezekuta medida tuir lei ne’ebé vigora iha Timor-Leste.
Objetivu prinsipál husi medida ne’e mak atu fó biban ba kompanhia konstrusaun hodi hahú servisu ba projetu alargamentu Aeroportu Internasionál Nicolau Lobato.
“Ita tuir prosesu ne’ebé klaru. Primeiru, ita halo diálogu no fó tempu ba família afetada. Balu koopera, maibé balu lakohi. Tanba ne’e, Estadu iha obrigasaun atu ezekuta desizaun tuir lei,” dehan Germano.
Nia hateten mós katak Governu selu ona indemnizasaun ba uma no ai-horis ba komunidade balu, no prosesu pagamentu ba família seluk sei kontinua.
Kona-ba direitu propriedade rai nian, Germano dehan katak Governu bazeia ba desizaun tribunál ne’ebé determina katak propriedade sira pertense ba Estadu.
Nia akresenta katak komunidade ne’ebé seidauk simu desizaun ne’e bele uza mekanizmu legál hodi hetan asisténsia jurídika no lori kazu ne’e ba tribunál.
Governu prepara mós kareta 10 atu ajuda família afetada sira lori sira nia sasán ba fatin foun iha Metinaro, Tibar, Likisá no Lospalos.
Jornalista: Camilio de Sousa
Editór: Filomeno Martins
