DILI, 16 Jullu 2026 (TATOLI)–Tribunál Judisiál Primeira Instánsia Dili (TJPID), Kinta ne’e, halo interrogatóriu judisiál dahuluk ba prosesu NUC. 0248/26.PNSIK, ba arguidu na’in-75 ne’ebé suspeitu envolve iha atividade scam ne’ebé opera iha uma aluger ida iha área Ulmera, Suku Tibar, Postu Administrativu Bazartete, Munisípiu Likisá, foin lalais ne’e, ne’ebé Diresaun Servisu Investigasaun Kriminál (DSIK) halo detensaun.
Iha interogatóriu dahuluk ne’e, Ministeriu Públiku (MP) promove arguidu sira ho krime burla informátika, brankamentu kapitál no asosiasaun kriminozu.
MP ne’ebé reprezenta Prokuradór, Domingos Gouveia, solisita ba Tribunál atu aplika medida koasaun aprezentasaun períodika, medida proibisaun auzénsia no medida kausaun ho osan $10.000 ba arguidu D nu’udar Jerente ba jogu online no scam call center.
Hafoin ne’e, MP husu Tribunál atu aplika medida prestasaun kausaun $5.000.
Parte Defeza nia husu Tribunál atu aplika medida koasaun aprezentasaun períodika, medida proibisaun auzénsia no medida kausaun ho osan menus $5.000 bazeia ba arguidu sira-nia kondisaun finansiál.
Notísia relevante : PNTL rejista iha MP kazu scam iha Ulmera no Kampung Baru
Hafoin rona tiha parte sira ne’e, Tribunál hasai despaisu hodi aplika medida kausaun $10.000 ba Jerente jogu online no scam call center iha Ulmera.
Nune’e, iha Tribunál nia despaisu Tribunál aplika medida kausaun ba arguidu sira. Tribunál fó prazu durante loron-20 nia laran no medida koasaun aprezentasaun períodika ne’e, fulan-ida dala-rua ba aprezenta-an iha Postu Polísia ne’ebé mak besik.
Hafoin interrogatóriu dahuluk, Defeza ba arguidu sira, Henrique Mariz, hateten, ohin iha Tribunál nia despaisu aplika medida koasaun tolu no medida kausaun ba arguidu na’in-76. Iha arguidu na’in-ida mak Tribunál aplika medida kausaun $10.000, enkuantu arguidu na’in-75 Tribunál aplika medida kausaun $2.500.
“Iha medida koasaun aprezentasaun períodika, medida proibisaun auzénsia no medida kausaun ba arguidu sira. Iha despaisu ida-ne’e menus liu ona, tanba antes iha alegasaun Ministériu Públiku husu ba Tribunál atu aplika medida kausaun ba Manajer ne’e $10.000 no arguidu na’in-75 ne’e husu medida prestasaun kausaun $2.500 durante prazu loron-20 nia laran, inklui medida koasaun termu identidade rezidénsia, ne’ebé mak antes ne’e Autoridade Seguransa aplika ona ba arguidu sira,” nia informa.
Iha prosesu interrogatóriu dahuluk ne’e, prezide husi Juíz Turnu, José Maria, Ministériu Públiku reprezenta Prokuradór, Domingos Gouveia, arguidu na’in-76 hetan asisténsia legál husi Defensór Públiku, Henrique Mariz.
Jornalista : Natalino Costa
Editora : Julia Chatarina
