DILI, 17 Jullu 2026 (TATOLI)—Jogadór atakante Daniel Asino sai figura importante iha jogu jornada daualu Liga Timorense 2026 bainhira Karketu Dili FC kontra Assalam FC, ho nia golu lori ekipa Karketu konsege fahe pontu 1-1 iha Estadiu Munisipál Dili, kinta kalan.
Jogu ba ekipa rua hala’o iha tuku 20:00 oras Timor-Leste nian no Karketu Dili lidera uluk jogu 1-0 antes Assalam konsege empata.
Bainhira jogu hahú ekipa rua lansa kontra-atake ba malu tuir tékniku no abilidade ne’ebé iha. Karketu ho treinadór Bernard Teye halo presaun ba Assalam, maibé Assalam ho treinador Alarico da Costa la nonok, luta kontra.
Karketu tama ho formasaun 4-3-3. Expedito Ferreira iha guarda-rede, linha defeza 4 Nelson Viegas, Yohanes Gusmao, Antonio Martins no Rekxy Kurniawan. Iha meiu, Orcelio da Silva, Feliciano Goncalves no Inigo Braz kontrola bola. Iha oin, Barnabas Soibor, Gaudencio Monteiro no Daniel Asino tenta fura defiza Assalam.
Assalam mós mai ho 4-3-3. Maiki Miwa iha guarda-rede, defeza lidera husi Bonarudin Amin no Rivaldinho Gusmao. Iha meiu kampo, Ivan Lay tenta kontrola bola hamutuk ho Noezio dos Santos no Rio Kato. Iha oin, Genario Soares, Natalicio Soares no Anito Fernandes tenta buka kuak Karketu nian.
Jogu la’o husi minutu ba minutu to’o primeira parte. Karketu domina maka’as no hetan rezultadu. Iha minutu 29, Daniel Asino hetan bola pasa diak no fura rede Assalam muda rezultadu ba 1-0.
Jogu la’o ho ritmu ne’ebé maka’as to’o apitu finál primeira parte lian Karketu provijoriu lidera jogu ho vantajen 1-0.
Bainhira segunda parte hahú, Assalam halo atake kedas. Sira sai ameasa ida ba Karketu nia defeza. Karketu la nonook, responde mós ho kontra-atake maibé guarda-rede Maiki Miwa no defiza Assalam joga ho matenek.
Assalam kontinua buka Karketu nia frakeza. Iha minutu 61 to’o ona iha tornu Assalam nian. Rivaldinho Gusmao hetan bola iha kaixa penalti no konsege muda rezultadu ba 1-1.
Banku Assalam hotu haksolok. Rivaldinho ne’ebé markadór golu sai figura importante ba nia ekipa iha jogu ne’e.
Minutu 62-90 ekipa rua kontinua atake malu ho forsa tomak. Karketu liu husi suplente Munin Mohammed no Armando Bere tenta aumenta golu. Iha parte seluk, Assalam mós tama ho Edilson Marques no Norberto da Costa ba lina laran hodi ajuda defeza.
Jogadór sira hanesan José Fernandes no Leucio da Silva husi Assalam iha oportunidade maibé Expedito Ferreira salva no la rezulta golu
Husi luta makaas ne’e lori apitu ikus lian jogu ho rezultadu empate 1-1 ba Karketu Dili no Assalam.
Iha tabele klasifikasaun provizóiu Assalam ho pontu sia, Karketu Dili FC 17 no mantein sira-nia pozisaun iha zona livre hodi mantein nafatin iha Primeira Divizaun.
Jornalista : Hortêncio Sanchez
Editór : Cancio Ximenes
