OEKUSI, 17 Jullu 2026 (TATOLI) – Tékniku, Lokutór, no Jornalista José Maria Feno, ne’ebé koñesidu ho naran Joe Feno, eleitu ofisialmente nu’udar Jestór foun ba Rádiu Komunidade Atóni Lifau (RCAL). Joe Feno hamutuk ho ninia Kuadru, Filomena Sila, sei lidera instituisaun ne’e ba períodu tinan-lima (2026-2031), hodi troka Jestór Sesante, José Francisco Efi.
Eleisaun ne’e hala’o liuhusi Asembleia Jerál ne’ebé dekorre iha Salaun Nidela Padimau, Pante Makasar, iha Rejiaun Administrativa Espesiál Oekusi Ambeno (RAEOA), sesta ne’e.
Hafoin mandatu ne’e entrega, José Feno hato’o ninia felisitasaun kle’an no agradese ba Maromak, bei-ala sira, no membru asembleia jerál sira hotu ba konfiansa boot ne’ebé fó ona ba nia.
“Ha’u simu kargu ida-ne’e ho haraik-an, maibé mós ho fuan ne’ebé nakloke no prontu atu serbisu,” nia deklara ho laran-metin hafoin eleitu.
Notísia relevante:Jornalista-lokutora Ercilia ne’ebé lori programa “Hallo Enclave” hakotu iis
Apoia husi ninia esperiénsia naruk iha mundu komunikasaun, Jestór foun ne’e otimísta katak, maske kna’ar ne’ebé nia simu ne’e todan, nia sei esforsa ho kbiit no matenek hotu ne’ebé nia iha hodi presta serbisu ho responsabilidade, nune’e bele mantein ezisténsia kanál komunikasaun ne’e iha públiku nia matan no tilun.
“Fiar ida-ne’e la’ós kargu ne’ebé kma’an, maibé todan iha ha’u-nia kaba’as tanba mai ho nível edukasaun ne’ebé ha’u iha, seidauk bele simu realidade ida-ne’e,” nia afirma.
Feno konsidera katak rádiu komunidade la’ós de’it meius komunikasaun baibain, maibé nu’udar “Lian Povu Nian” no odamatan boot ba populasaun sira hodi asesu ba informasaun ne’ebé lójiku no loloos, liliu ba komunidade sira-ne’ebé hela iha área remota no izoladu sira.
Iha ninia programa kampaña, nia kompromete katak durante mandatu ne’e, nia sei promove liña koordenasaun ne’ebé metin ho jestór sesante sira, tanba sakrifísiu ne’ebé investe ona iha pasadu iha objetivu úniku ida: rádiu tenke hamriik metin nafatin iha sosiedade nia leet.
“Ha’u rekoñese duni serbisu boot no sakrifísiu ne’ebé jestór tuan no ekipa sira uluk halo ona, dezde 2002 hodi lori rádiu ne’e hamriik metin to’o ohin loron. Imi-nia dedikasaun hotu, ha’u hato’o mós ha’u-nia apresiasaun, respeitu no ksolok boot,” nia katak.
Misaun no kontinuidade
Iha fatin hanesan, Jestór Sesante, José Francisco Efi, ne’ebé lidera ona Rádiu Komunidade Atóni Lifau naruk tebes husi tinan-2009 to’o 2026, hatudu ninia konfiansa tomak ba fali estrutura foun ne’ebé foin eleitu hodi kontinua vizaun rádiu nian.
Notísia relevante:SEKOMS lansa matadalan ba Rádiu Komunidade 16
“Agradese ua’in, durante ha’u-nia mandatu ezerse ona ha’u-nia funsaun ho másimu, buat ne’ebé rai hela kontinua hatutan no hadi’a, maibé importante liu maka Rádiu Komunidade Atóni Lifau tenke sai ponte informasaun komunidade no ba makaer ukun sira iha RAEOA,” José Francisco Efi dehan ho orgullu.
Notísia relevante:SEKOMS selebra akordu transferénsia públiku daruak ba Rádiu Komunidade 16
Iha biban ne’e, Diretór Diresaun Nasionál Dezenvolvimentu Mídia, Júlio Lopes, reprezenta Sekretáriu Estadu Komunikasaun Sosiál (SEKOMS), enkoraza estrutura foun atu kontinua presta serbisu ho profisionál no akumula entidade hotu.
“Governu liuhusi SEKOMS kada tinan tau matan nafatin bai ta bo’ot sira, tanba ne’e fiar katak ho mandate foun ne’e kontinua nafatin imi nia profisaun ho hatudu profisionál, hakuak entidade hotu, tanba komunidade presiza kanál ida atu hetan inforasaun lokál sira,” nia epela.
Entretantu, Jestór Sesante José Francisco Efi, lidera Rádiu Komunidade Atóni Lifau hahú iha 2009 to’o 2026 ne’e.
Jornalista: Abílio Elo Nini
Editór: Rafael Ximenes de A. Belo
