DILI, 17 Jullu 2026 (TATOLI)-Komisaun Anti-Korrupsaun (KAK) sei aprosima sekretariadu Parlamentu Nasionál hodi haree formatu lista prezensa ba deputadu sira bainhira bá halo fiskalizasaun iha baze.
Adjuntu Prevensaun no Sensibilizasaun iha KAK, Rosário Salsinha Araújo, hato’o kestaun ne’e relasiona ho deklarasaun Prezidente Parlamentu Nasionál, Maria Fernanda Lay, foin lala’is ne’e hodi husu Komisaun Permanente atu tau atensaun ba lista prezensa durante hala’o fiskalizasaun iha baze, tanba deputadu balun simu tiha per diem, maibé la bá terrenu.
Nia hateten katak ideia ne’e modalidade di’ak tebes hodi halo sistema transparénsia la’o no hahú aprosima boa governasaun ba kontribuisaun parte hotu nian hodi halo duni serbisu ba nasaun ne’e.
Maski nune’e, KAK seidauk iha indikasaun ruma ne’ebé hatudu deputadu balun simu tiha osan per diem la bá halo fiskalizasaun iha terrenu.
“Maibé, andamentu ne’ebé Prezidente Parlamentu ko’alia ida-ne’e mak la’o duni, ema hotu serbisu ho laran ba nasaun no asegura duni osan Estadu labele uza sala, nune’e efisiénsia ezekusaun orsamentu bele di’ak, se la’e gasta tiha, produtividade menus”, nia hateten.
Tuir lei, bainhira ema ida simu tiha osan mak nia bá halo serbisu la atinje ninia loron hodi inventa maka halo abuzu podér no falsifikasaun.
“KAK sei aprosima iha parte sekretariadu Parlamentu nian, hodi haree sira-nia formatu loloos kona-ba lista prezensa, oinsá aplika iha terrenu, atu justifika duni halo serbisu iha terrenu”, dehan.
Nia hateten KAK seidauk to’o ba averiguasaun, maibé KAK nia papél ida atu halo monitorizasaun no inspesaun hodi hatene formatu lista prezensa ne’ebé agora dezeña hela. Bainhira implementa ona iha terrenu, KAK sei bá verifika hodi buka justifikasaun no konfirma katak prosesu ne’e la’o ho loloos.
“Ne’e serbisu ida di’ak liu, tanba ita iha hela referénsia no prova balun bele gia lori bá terrenu, bele halo serbisu di’ak liu, liuliu ba fiskalizasaun sira”, katak.
Liuhusi ida-ne’e mak halo análize ba ninia formatu hafoin halo akompañamentu iha terrenu. Parte KAK labele halo konkluzaun ba deklarasaun Prezidente Parlamentu nian, tanba seidauk ka’er prova ruma.
Kestiona kona-ba bainhira mak KAK bá sekretariadu Parlamentu, nia hateten katak ho notísia ne’ebé Tatoli fó sai fasilita KAK no iha tempu badak bele halo inisiativa ne’e.
Notísia relevante: Prezidente Parlamentu husu komisaun sira aneksa lista prezensa iha fiskalizasaun iha baze
Jornalista: Nelson de Sousa
Editora: Maria Auxiliadora
