DILI, 18 Jullu 2026 (TATOLI) – Ai-Leba hatudu dominásiu totál hafoin manán Santo Antonio Manatutu ho pontuasaun finál 62-28 iha Liga Nasionál Basketeból Timor Leste kategoria Jogu Feminina. Vitoria ne’e hahú kedas husi kuarter dahuluk ho lideransa makaas. Jogu ba ekipa rua hala’o iha Jináziu Dili, sábadu dader.
Iha kuarter dahuluk, Ai-Leba hatudu jogu ho kualidade aas tebes. Sira kontrola ritmu jogu husi hahú no loke vantajen boot hasoru Santo Antonio Manaututo.
Ekipa ne’e hetan oportunidade barak husi bola perde no aproveita ho di’ak. Jogadór Ai-Leba barak liu lansa ba kaixa no shoot husi distansia dook hodi hasa’e sira nia pontu ho lalais. Defensa makaas mós halo Santo Antonio Manaututo susar atu marka pontu.
Tama ba kuarter daruak, Ai-Leba nafatin kontrola tomak jogu no kontinua aumenta sira nia lideransa. Sira hatudu kualidade iha atake no defensa. Santo Antonio Manaututo tenta luta hodi buka pontu, maibé Ai-Leba nia presaun makaas liu halo ekipa adeversariu labele desenvolve sira nia jogu.
Tama ba kuarter datoluk no dahaat, Ai-Leba mantein nia konsistensia. Maski Santo Antonio Manaututo halo esforsu hodi reduz pontu, maibé diferensa ne’ebé luan liu ona difisil atu alkansa.
Ai-Leba kontinua ho jogu ekipamentu, pasa bola di’ak no finaliza ho efisiensia. Iha parte seluk, Santo Antonio Manaututo konsege hatudu espíritu luta to’o minutu ikus no konsege marka pontu 28.
Ho rezultadu 62-28 ne’e, Ai-Leba konsege hadau vitoria importante iha Liga Nasionál Basketeból Feminina.
Jornalista: Hortêncio Sanchez
Editor: Florencio Miranda Ximenes
