DILI, 18 Jullu 2026 (TATOLI) – Salazar hatudu dominasiu total hafoin manán ADR União ho pontuasaun finaál 42-23 iha Liga Nasionál Basketeból Timor-Leste (LNBTL) kategoria Jogu Feminina. Vitoria ne’e hahú kedas husi kuarter dahuluk ho lideransa makaas. Jogu ba ekipa rua hala’o iha Jináziu Dili, sábadu kalan.
Kuarter 1: Salazar lidera makaas
Iha kuarter dahuluk, Salazar hatudu jogu ho kualidade aas tebes. Sira kontrola ritmu jogu husi hahú no loke vantajen boot hasoru ADR União.
Ekipa ne’e hetan oportunidade barak husi bola perde no aproveita ho di’ak. Jogadór Salazar barak liu lansa ba kaixa no shoot husi distansia dook hodi hasa’e sira nia pontu ho lalais. Defensa makaas mós halo ADR Uniao susar atu marka pontu.
Kuarter 2: Salazar aumenta lideransa
Tama ba kuarter daruak, Salazar nafatin kontrola tomak jogu no kontinua aumenta sira nia lideransa.
Sira hatudu kualidade iha atake no defensa. ADR Uniao tenta luta hodi buka pontu, maibé Salazar nia presaun makaas liu halo ekipa adeversariu labele desenvolve sira nia jogu.
Kuarter 3 no 4: Jogu termina ho vitoria 42-23
Tama ba kuarter datoluk no dahaat, Salazar mantein nia konsistensia. Maski ADR Uniao halo esforsu hodi redus pontu, maibé diferensa ne’ebé luan liu ona difisil atu alkansa.
Salazar kontinua ho jogu ekipamentu, pasa bola diak no finaliza ho efisiensia. Iha parte seluk, ADR Uniao konsege hatudu espíritu luta to’o minutu ikus no konsege marka pontu 23.
Ho rezultadu 42-23 ne’e, Salazar konsege hadau vitoria importante iha Liga Nasionál Basketeból Feminina.
Jornalista: Hortêncio Sanchez
Editor: Florencio Miranda Ximenes
