Liga Basketeból TL: ekipa Alligators domina jogu no halakon DT
DILI, 18 Jullu 2026 (TATOLI) – Alligators hatudu dominasiu total hafoin manán DT ho pontuasaun finál ho eskore 69-19 iha Liga Nasionál Basketeból Timor Leste (LNBTL) kategoria Jogu Feto. Vitoria ne’e hahú kedas husi kuarter dahuluk ho shutout. Jogu ba ekipa rua hala’o iha Jináziu Dili, sábadu meudia.
Iha kuarter dahuluk, Alligators hatudu jogu ho kualidade aas tebes. Sira kontrola ritmu jogu husi hahú no loke vantajen boot hasoru DT.
Ekipa ne’e hetan oportunidade barak husi bola perde no fast break makaas. Jogadór Alligators barak liu lansa ba kaixa no aproveita liu oportunidade foult hodi hasa’e sira nia pontu. Defensa makaas mós halo DT susar atu marka pontu, no termina kuarter dahuluk ho 0-15.
Kuarter 2: Alligators aumenta lideransa 26-2
Tama ba kuarter daruak, Alligators nafatin kontrola tomak jogu no kontinua aumenta sira nia lideransa.
Sira hatudu kualidade iha atake no defensa. DT tenta luta hodi buka pontu no konsege marka 2, maibé Alligators nia presaun makaas liu halo ekipa adeversariu labele desenvolve sira nia jogu. Kuarter ne’e termina ho vantajen 26-2 ba Alligators.
Kuarter 3 no 4: Jogu termina ho vitoria 69-19
Tama ba kuarter datoluk, Alligators mantein nia konsistensia no lori pontu to’o 53-17.
Tama ba kuarter dahaat, DT hatudu espíritu luta no konsege aumenta sira nia pontu ba 19. Maibé diferensa ne’ebé luan liu ona difisil atu alkansa. Alligators kontinua ho jogu ekipamentu, pasa bola diak no finaliza ho efisiensia to’o termina ho 69.
Ho foult barak ne’ebé akontese iha jogu, ekipa rua uza oportunidade liu husi free throw hodi ajuda sira nia pontu. Maibé Alligators maka aproveita di’ak liu no mantein nia dominasiu to’o apitu ikus.
Ho rezultadu 69-19 ne’e, Alligators konsege hadau vitoria importante iha Liga Nasionál Basketeból Feto.
Jornalista: Hortêncio Sanchez
Editor: Florencio Miranda Ximenes
