DÍLI, 18 Jullu 2026 (TATOLI) – Membru Resistência Nacional dos Estudantes de Timor-Leste (RENETIL-Sigla Portugés) hamutuk nain 3.000-resin husi munisípiu hotu partisipa iha Kongresu RENETIL IX 2026, ne’ebé realiza durante loron rua, hahu iha 18 to’o 19 Jullu, iha Salaun Casimiro, Universidade da Paz (UNPAZ), Surik Mas, Díli.
Sekretáriu-Jerál RENETIL, Joaqim Fonseca, hateten kongresu ne’e ho objetivu atu reúne membru sira husi munisípiu hotu hodi halo avaliasaun ba situasaun mikro no makro organizasaun nian, haree fila-fali ba servisu no kontribuisaun ne’ebé halo ona iha tempu liubá, no prepara orientasaun ba papel RENETIL iha dezenvolvimentu nasionál iha futuru.
“Ohin membru RENETIL hamutuk nain 3.000-resin husi munisípiu hotu mai tuir Kongresu RENETIL IX 2026 hodi diskute no avalia ba situasaun internal mikro no makro ne’ebé RENETIL kontribui ona ba dezenvolvimentu nasionál,” Joagim ba jornalista sira iha Salaun Casimiro, Universidade da Paz (UNPAZ), Surik Mas, Díli, ohin.
Nia esplika katak avaliasaun mikro sei foka ba dezempeñu organizasaun durante tinan haat liubá no kontribuisaun RENETIL ba Timor-Leste. Enkuantu avaliasaun makro sei diskute kona-ba situasaun nasaun nian, liuliu iha área seguransa, saúde, edukasaun, polítika, justisa, ekonomia, agrikultura no setor relevante sira seluk, hodi buka hanoin no rekomendasaun ba dezenvolvimentu nasionál.
Prezidente Konsellu Sentrál RENETIL (CCR), José António de Jesus Neves “Samalarua”, hateten tema Kongresu RENETIL IX tinan ida-ne’e mak “Hametin Konsénsia Krítika ba Konstrusaun Estadu no Transformasaun Nasionál.”
“Liuhosi tema ida-ne’e, hanesan espasu ba reflexaun kona-ba papel istóriku RENETIL, kontribuisaun membru sira nian ba konstrusaun Estadu no formulasaun orientasaun estratéjika atu responde ba dezafiu no oportunidade sira ba futuru Timor-Leste,” dehan Samalarua.
Xefe Estadu-Maior Jenerál FALINTIL-Forsa Defeza Timor-Leste (F-FDTL), Tenente-Jenerál Domingos Raúl “Falur Rate Laek”, parabeniza membru RENETIL hotu tanba realiza Kongresu IX no husu organizasaun atu kontinua hametin konsénsia krítika ba konstrusaun Estadu no transformasaun nasionál.
Nia mós encoraja membru sira atu kontinua fó kontribuisaun ba unidade no dezenvolvimentu nasaun.
“Hau konvida imi tenke sai dinamizadór ba unidade nasionál, dinamizadór ba rekonsiliasaun nasionál, dinamizadór ba konsensializasaun nasionál no tenke sai mós dinamizadór ba moralidade nasionál,” nia konklui.
Kongresu RENETIL IX 2026 hetan partisipasaun husi Vise-Primeiru-Ministru Mariano Assanami Sabino, Sabino Lopes, membru Governu sira ne’ebé mai husi RENETIL, inklui Miguel Marques Gonçalves Manetelu no Arsénio Pereira, Xefe Estadu-Maior Jenerál F-FDTL, membru RENETIL sira no konvidadu importante sira seluk.
Atividade ne’e hetan apoiu finanseiru husi Gabinete Vise-Primeiru-Ministru ba Asuntu Sosiál, Mariano Assanami Sabino, hamutuk ho osan liu US$24.000, no kontribuisaun husi membru RENETIL sira hamutuk ho liu US$5.000 atu suporta realizasaun Kongresu RENETIL IX 2026.
Jornalista: Camilio de Sousa
Editór: Filomeno Martins
