Autoridade Uatulari lansa merkadu tradisionál iha suku Makadike Uaitame
VIKEKE, 19 Jullu 2026 (TATOLI)-Autoridade Postu Uatulari, munisípiu Vikeke hamutuk komunidade ofisiálmente lansa merkadu tradisionál ida iha suku Makadike Uaitame ne’ebé lokaliza iha foho Matebian hodi fasilita negosiante sira faan produtu lokál.
Merkadu ne’e ho objetivu atu promove ekonómia lokál no fasilita agrikultór sira hodi fa’an produtu lokál hanesan foos metan, nuu maran, no ai-han seluk, inklui apoia ativamente ligasaun merkadu ba komunidade sira hela iha área rurál.
“Ohin ami lansa ona merkadu iha ami-nia suku atu komunidade sira bele faan sira-nia produtu lokál sira-ne’ebé prodús tanba ami suku foun ne’ebé foin eziste. Durante ne’e, ami-nia komunidade sira asesu merkadu tenke ba Laisorulai no merkadu iha Uatulari Villa. Tan ne’e, mak ami ho inisiativa loke merkadu”, Xefe Suku Makadike, José Pinto Soares, ba Tatoli hafoin lansamentu merkadu referidu, iha postu Vikeke Vila, ohin.
Autoridade komunitária ne’e dehan merkadu ne’ebé daudauk loke ne’e seidauk iha fasilidade hanesan uma no negosiante sira faan produtu lokál nahe lona iha rain mak sira faan sira-nia produtu lokál.
“Ita seidauk iha fasilidade uma merkadu, daudauk ne’e ita-nia negosiante sira faan iha rai, maibé oin mak ita fundu ruma ita bele tau planu hodi konstrui uma merkadu hodi komunidade sira uza”, nia subliña.
Merkadu ida-ne’e lokaliza kedan iha sentru entaun komunidade sira suku viziñu hanesan suku Matahoi hanesan aldeia Ulusu, Iraler no suku Uaitame parte aldeia Sana bele asesu hotu inklui negosiante sira husi postu ho karreta mós bele mai faan sira-nia produtu iha ne’e.
“Merkadu ne’e, ami loke loron kinta, maibé loron seluk laiha. Ha’u sente merkadu ida-ne’e sei benifísia tebes ba ita-nia komunidade sira, hodi hetan osan atu sustenta família liuhusi faan produtu lokál sira-ne’ebé ita-nia komunidade sira prodús”, nia akresenta.
Tuir dadus populasaun suku Makadike Uaitame ho totál uma-kain 200 no totál abitante hamutuk na’in-686 ne’ebé iha suku refereridu.
Iha fatin hanesan, Komunidade suku Makadike Uaitame, Abilo Lopes, hatutan merkadu ne’ebé autoridade suku loke iha suku Makadike Uaitame ne’e fasilita komunidade sira bele faan produtu lokál sira hanesan feuk, talas, fore rai, modo no produtu sira seluk.
“Ha’u sente ba merkadu ne’e bele ajuda ami faan ami-nia produ tanba durante ne’e ami bá faan iha Laisorulai kuaze kilómetru lima, enkuantu ba Uatulari kilómetru ualu resin. Maibé, agora loke ona besik ami ne’e fasilita ona ami para faan ami-nia produtu no ami mós bele sosa produtu nesesidade báziku sira husi fabrikanu nian”, nia afirma.
Nia subliña, iha lansamentu merkadu iha suku Makadike Uaiteme ne’e lokaliza besik sede suku Makadike Uaitame no iha serimónia lansamentu ne’e komunidade sira faan produtu lokál no jogu futu manu tradisionál.
Entretantu, lansamentu merkadu iha suku Makadike Uaitame hetan partisipasaun husi autoridade lokál husi suku ualu, autoridade seguransa husi eskuadra Uatulari, komunidade suku Uaitame no negosiante sira.
Jornalista : Vitorino Lopes da Costa
Editór : Florencio Miranda Ximenes
