DILI, 19 Jullu 2026 (TATOLI) – Brotherhood hatudu jogu ne’ebé konsistente hafoin manán Lemocor ho pontuasaun finaál 46-34 iha Liga Nasionál Basketeból Timor-Leste (LNBTL) kategoria Jogu Maskulinu.
Vitoria ne’e hahú kedas husi kuarter dahuluk ho lideransa makaas. Jogu ba ekipa rua hala’o iha Jináziu Dili, Domingu kalan.
Iha kuarter dahuluk, Brotherhood hatudu jogu ho kualidade aas tebes. Sira kontrola ritmu jogu husi hahú no loke vantajen boot hasoru Lemocor.
Ekipa ne’e hetan oportunidade barak husi bola perde no aproveita ho di’ak. Jogadór Brotherhood barak liu lansa ba kaixa no shoot husi distansia dook hodi hasa’e sira nia pontu ho lalais. Defensa makaas mós halo Lemocor susar atu marka pontu.
Tama ba kuarter daruak, Brotherhood nafatin kontrola tomak jogu no kontinua aumenta sira nia lideransa.
Sira hatudu kualidade iha atake no defensa. Lemocor tenta luta hodi buka pontu, maibé Brotherhood nia presaun makaas liu halo ekipa adeversariu labele desenvolve sira nia jogu.
Tama ba kuarter datoluk no dahaat, Brotherhood mantein nia konsistensia. Maski Lemocor halo esforsu hodi redus pontu, maibé diferensa ne’ebé luan liu ona difisil atu alkansa.
Brotherhood kontinua ho jogu ekipamentu, pasa bola diak no finaliza ho efisiensia. Iha parte seluk, Lemocor konsege hatudu espíritu luta to’o minutu ikus no konsege marka pontu 34.
Ho rezultadu 46-34 ne’e, Brotherhood konsege hadau vitoria importante iha Liga Nasionál Basketeból Maskulinu.
Jornalista: Hortêncio Sanchez
Editor: Florencio Miranda Ximenes
