DILI, 19 Jullu 2026 (TATOLI) – Ponta Leste hatudu jogu ne’ebé konsistente hafoin manán Lemocor ho pontuasaun finál ho pontu 58-29 iha Liga Nasionál Basketeból Timor-Leste (LNBTL) kategoria Jogu Feminina.
Vitoria ne’e hahú kedas husi kuarter dahuluk ho lideransa makaas. Jogu ba ekipa rua hala’o iha Jináziu Dili, Domingu kalan.
Iha kuarter dahuluk, Ponta Leste hatudu jogu ho kualidade aas tebes. Sira kontrola ritmu jogu husi hahú no loke vantajen boot hasoru Lemocor.
Ekipa ne’e hetan oportunidade barak husi bola perde no aproveita ho di’ak. Jogadór Ponta Leste barak liu lansa ba kaixa no shoot husi distansia dook hodi hasa’e sira nia pontu ho lalais. Defensa makaas mós halo Lemocor susar atu marka pontu.
Tama ba kuarter daruak, Ponta Leste nafatin kontrola tomak jogu no kontinua aumenta sira nia lideransa.
Sira hatudu kualidade iha atake no defensa. Lemocor tenta luta hodi buka pontu, maibé Ponta Leste nia presaun makaas liu halo ekipa adeversariu labele desenvolve sira nia jogu.
Tama ba kuarter datoluk no dahaat, Ponta Leste mantein nia konsistensia. Maski Lemocor halo esforsu hodi redus pontu, maibé diferensa ne’ebé luan liu ona difisil atu alkansa.
Ponta Leste kontinua ho jogu ekipamentu, pasa bola diak no finaliza ho efisiensia. Iha parte seluk, Lemocor konsege hatudu espíritu luta to’o minutu ikus no konsege marka pontu 29.
Ho rezultadu 58-29 ne’e, Ponta Leste konsege hadau vitoria importante iha Liga Nasionál Basketeból Feminina.
Jornalista: Hortêncio Sanchez
Editor: Florencio Miranda Ximenes
