DILI, 19 Jullu 2026 (TATOLI) – Ai-Leba hatudu jogu ne’ebé extraordinariu hafoin manán Ponta Leste ho pontuasaun finaál 54-40 iha Liga Nasionál Basketeból Timor-Leste (LNBTL) kategoria mane. Jogu ne’e la’o emosionál, basá hetan apoiu másimu husi adeptus klube rua nian.
Vitoria ne’e hahú kedas husi kuarter dahuluk ho lideransa makaas. Jogu ba ekipa rua hala’o iha Jináziu Dili, Domingu dader.
Iha kuarter dahuluk, Ai-Leba hatudu jogu ho kualidade aas tebes. Sira kontrola ritmu jogu husi hahú no loke vantajen boot hasoru Ponta Leste.
Ekipa ne’e hetan oportunidade barak husi bola perde no aproveita ho di’ak. Jogadór Ai-Leba barak liu lansa ba kaixa no shoot husi distansia dook hodi hasa’e sira nia pontu ho lalais. Defensa makaas mós halo Ponta Leste susar atu marka pontu.
Tama ba kuarter daruak, Ai-Leba nafatin kontrola tomak jogu no kontinua aumenta sira nia lideransa.
Sira hatudu kualidade iha atake no defensa. Ponta Leste tenta luta hodi buka pontu, maibé Ai-Leba nia presaun makaas liu halo ekipa adeversariu labele desenvolve sira nia jogu.
Kuarter 3 no 4: Jogu termina ho vitoria 54-40
Tama ba kuarter datoluk no dahaat, Ai-Leba mantein nia konsistensia. Maski Ponta Leste halo esforsu hodi redus pontu, maibé diferensa ne’ebé luan liu ona difisil atu alkansa.
Ai-Leba kontinua ho jogu ekipamentu, pasa bola diak no finaliza ho efisiensia. Iha parte seluk, Ponta Leste konsege hatudu espíritu luta to’o minutu ikus no konsege marka pontu 40.
Ho rezultadu 54-40 ne’e, Ai-Leba konsege hadau vitoria importante iha Liga Nasionál Basketeból mane.
Jornalista: Hortêncio Sanchez
Editor: Florencio Miranda Ximenes
