José Gonçalves “Si’ak” eleitu Secretáriu-Jerál foun RENETIL ba mandatu 2026–2030

DÍLI, 20 Jullu 2026 (TATOLI) – Organizasaun Resisténsia Nasionál Estudante Timor-Leste (RENETIL), liuhosi Kongresu IX ne’ebé hala’o iha Salaun Jóse Casimiro, Universidade da Paz (UNPAZ), Díli, iha loron 18–19 Jullu 2026, hili José A.M.X. Gonçalves “Si’ak” nu’udar Secretáriu-Jerál foun RENETIL ba mandatu tinan haat 2026-2030.

José A.M.X. “Si’ak” substitui Joagim Fonseca ne’ebé lidera RENETIL durante mandate tinan haat 2022–2026.

Depois eleitu, José “Si’ak” hateten katak mandatu foun ne’e sai oportunidade atu hametin unidade organizasionál, reforsa valor sira husi Resisténsia, no kontinua hakbiit konsénsia krítika membru sira hodi kontribui ba konstrusaun Estadu no transformasaun nasionál.

“Ita sei kontinua reafirma kompromisu organizasaun nian atu hametin konsénsia krítika, unidade organizasionál no prepara lideransa foun ne’ebé sei lori organizasaun ba etapa foun iha kontribuisaun ba konstrusaun Estadu no transformasaun nasionál no kontinua nafatin ‘Reflete Pasadu, Afirma Prezente no Projeta Futuru’,” Si’ak hateten UNPAZ, Díli.

Nia sei lidera RENETIL hamutuk ho vise Secretáriu-Jerál na’in rua, mak Teresa Verdial “Tera” no Edwin Noronha “Atati”.

Kongresu RENETIL IX 2026 hala’o ho tema “Hametin Konsénsia Krítika ba Konstrusaun Estadu no Transformasaun Nasionál”, ne’ebé reúne membru husi munisípiu hotu atu avalia dezempeñu organizasaun no define orientasaun estratéjika ba futuru.

Druante kongresu, RENETIL mós aprova rezolusaun 12 hodi sai hanesan orientasaun ba lideransa foun organizasaun nian.

Rezolusaun hirak ne’e hetan aprovasaun iha loron daruak Kongresu IX RENETIL, ne’ebé hala’o iha Salaun Casimiro, Universidade da Paz (UNPAZ), Surik Mas, Díli, 19 Jullu, hafoin kongresista 3.000-resin halo avaliasaun ba lalaok organizasaun nian.

Rezolusaun hirak ne’e mak hanesan:

1. Rekoñese no Valoriza Partisipasaun Membru RENETIL
   Rekoñese no valoriza kontribuisaun militante hotu-hotu ne’ebé kontinua hametin espiritu luta, unidade no kompromisu ba misaun no valór sira RENETIL nian.
2. Hametin Efisiénsia no Transparénsia Despeza Administrativa
   Promove jestaun administrativu ne’ebé efisiente, transparente, responsavel no akontável hodi garante utilizasaun rekursu organizasaun nian ho di’ak.
3. Promove Programa Dezenvolvimentu “Neon Metin”
   Apoia no dezenvolve programa “Neon Metin” hanesan instrumentu ida atu hametin edukasaun polítika, lideransa, inovasaun no dezenvolvimentu juventude.
4. Kombate Krime Organizadu no Jogu Ilegál
   Apoia medida sira atu kombate krime organizadu, jogu ilegál, korrupsaun no atividade ilegál seluk ne’ebé ameasa seguransa, estabilidade no dezenvolvimentu nasionál.
5. Defende Liberdade Espresaun no Liberdade Imprensa
   Hametin no defende liberdade espresaun no liberdade imprensa hanesan pilar importante ba Estadu Demokrátiku no Estadu Direitu.
6. Promove Konsiénsia Krítika, Pensamentu Krítiku no Partisipasaun Ativa
   Insentiva dezenvolvimentu konsiénsia krítika, kapasidade análize no partisipasaun ativa husi sidadaun sira, liuliu juventude, iha prosesu demokrátiku no dezenvolvimentu nasionál.
7. Defende Independénsia Judisiál no Fortalese Sistema Justisa
   Hametin independénsia podér judisiál, garante prosesu disiplinár no nomeasaun ba Tribunál Supremu tuir prinsípiu meritokrasia, legalidade, transparénsia no independénsia.
8. Hametin Unidade Organizasaun Rezisténsia
   Hametin unidade no kooperasaun entre organizasaun Rezisténsia sira atu hamutuk defende interese komún nasaun nian, soberania no unidade nasionál.
9. Nakloke RENETIL ba Jerasaun Kontinuadór
   Nakloke RENETIL ba membru kontinuadór sira, liuliu estudante sira, atu kontinua mehi, vizaun, misaun no valór sira organizasaun nian ba futuru.
10. RENETIL Hanesan Motor Inspiradór ba Futuru
    Hametin papel RENETIL la’ós de’it hanesan memória institusionál Rezisténsia, maibé mós hanesan motor inspiradór ba lideransa foun, inovasaun no transformasaun nasionál.
11. Estabelese RENETIL Think Tank – Sentru Estudu Estratéjiku
    Kria RENETIL Think Tank – Sentru Estudu Estratéjiku atu halo peskiza, análize no formula proposta polítika públika kona-ba asuntu estratéjiku sira ba dezenvolvimentu Timor-Leste.
12. Dezenvolve Módulu Transformasaun Sívika ba Kuríkulu Edukasaun
    Rekomenda atu dezenvolve no integra módulu Transformasaun Sívika iha kuríkulu edukasaun nasionál hodi hametin patriotizmu, sidadania, lideransa, étika, demokrasia no konsiénsia nasionál ba jerasaun foun.

Jornalista: Camilio de Sousa
Editór: Filomeno Martins