AD SLB halakon Caesar Dante iha kompetisaun Liga Nasionál Basketeból Timor-Leste

DILI, 18 Jullu 2026 (TATOLI) – AD SLB hatudu jogu ne’ebé dominativu totál hafoin manán Caesar Dante ho pontuasaun finál ho pontu 62-15 iha kompetisaun Liga Nasionál Basketeból Timor-Leste (LNBTL) kategoria jogu Feminina.

Vitoria ne’e hahú kedas husi kuarter dahuluk ho lideransa makaas. Jogu ba ekipa rua hala’o iha Jináziu Dili, domingu meudia ne’e.

Iha kuarter dahuluk, AD SLB hatudu jogu ho kualidade aas tebes. Sira kontrola ritmu jogu husi hahú no loke vantajen boot hasoru Caesar Dante.

Ekipa ne’e hetan oportunidade barak husi bola perde no aproveita ho di’ak. Jogadór AD SLB barak liu lansa ba kaixa no shoot husi distansia dook hodi hasa’e sira nia pontu ho lalais. Defensa makaas mós halo Caesar Dante susar atu marka pontu.

Tama ba kuarter daruak, AD SLB nafatin kontrola tomak jogu no kontinua aumenta sira nia lideransa.

Sira hatudu kualidade iha atake no defensa. Caesar Dante tenta luta hodi buka pontu, maibé AD SLB nia presaun makaas liu halo ekipa adeversariu labele desenvolve sira nia jogu.

Tama ba kuarter datoluk no dahaat, AD SLB mantein nia konsistensia. Maski Caesar Dante halo esforsu hodi redus pontu, maibé diferensa ne’ebé luan liu ona difisil atu alkansa.

AD SLB kontinua ho jogu ekipamentu, pasa bola diak no finaliza ho efisiensia. Iha parte seluk, Caesar Dante konsege hatudu espíritu luta to’o minutu ikus no konsege marka pontu 15.

Ho rezultadu 62-15 ne’e, AD SLB konsege hadau vitoria importante iha Liga Nasionál Basketeból Feminina.

Jornalista: Hortêncio Sanchez

Editor: Florencio Miranda Ximenes