Autoridade Babulu solisita Governu reabilita estrada ligasaun área Abadere
VIKEKE, 20 Jullu 2026 (TATOLI)—Xefe Aldeia Abadere, Suku Babulu, Postu Administrativu Uatulari, Munisípiu Vikeke, Rogério Mascarinhas, solisita Governu liuhusi Ministériu Obra Públika (MOP) reabilita estrada liga bá knua Abadere hodi fasilita komunidade lori produtu lokál asesu merkadu.
“Estrada komesa husi Bebui to’o Kaikasabu to’o Daralari komesa tama bá reabiltasaun daudauk ona, maibé ha’u-nia komunidade Abadere iha área Abubu’u, Matau no Kaisa’e kondisaun grave tebes, difikulta ita-nia komunidade lori sira-nia produtu bá merkadu,” Rogério Mascarinhas ba jornalista sira Suku Babulu, Segunda ne’e.
Rogério haktuir katak durante ne’e estrada difikulta komunidade asesu bá merkadu, moras emerjénsia ruma iha área ne’ebá ambulánsia asesu ladi’ak.
“Tanba ne’e, ha’u hakarak hato’o proposta ba MOP se bele hadi’a netik ami-nia estrada, nune’e bele fasilita komunidade lori sira-nia produtu lokál bá merkadu, fasilita karreta asesu ba área ne’ebá,” nia sujere.
Nia haktuir katak uluk komunidade hamutuk ho autoridade sira kontribui osan hamutuk $5000 ho karau rua hodi selu Empreza EDZ loke dalan, maibé daudaun ne’e aat fali ona.
Hatán ba preokupasaun ne’e, Diretór Servisu Ministériu Obra Públika (MOP) Munisípiu Vikeke, Casildo S. Gomes haktuir, kona-ba preokupasaun Xefe Aldeia Abadere, MOP sei orienta tékniku sira hodi bá halo identifikasaun dadus estrada liga bá Abubu’u, Matau no Kaisa’e.
“Kona-ba preokupasaun ne’e tempu badak ami sei orienta tékniku sira bá halo identifikasuan estrada nian. Sei koordena mós autoridade lokál sira hodi akompaña ita-nia tékniku sira. Depoiz ita halo ita-nia identifikasaun hodi prepara dezeña no proposta ba ministériu tanba ministériu mak foti desizaun,” nia tenik.
Tuir dadus, populasaun Abadere ne’ebé hela iha área referida hamutuk uma-kain 35 no totál abitante hamutuk na’in-117, estrada husi Suku Babulu liga bá Kaisa’e ho totál kilómetru neen (6).
Jornalista: Vitorino Lopes da Costa
Editór: Xisto Freitas da Piedade
