GMPTL lamenta ho atitude husi figura públika balun hasoru feto
DILI, 20 Jullu 2026 (TATOLI)-Grupu Feto Parlamentár Timor-Leste (GMPTL, sigla portugés) lamenta ho atitude husi lideransa figura públika balun hasoru feto, tanba konsidera katak servidór Estadu tenke sai ezemplu di’ak ba komunidade.
Deputada membru GMPTL, Cedelízia Faria dos Santos, hato’o deklarasaun ne’e relasiona ho problema privadu entre atuál Prezidente Autoridade Munisípiu (PAM) Aileu ho inan-feton ida ne’ebé daudaun sai virál iha mídia sosiál.
Deputada husi bankada Kongresu Nasionál Rekonstrusaun Timorense (CNRT, sigla portugés) dehan nia triste ho situasaun ne’e, tanba tuir nia, PAM nu’udar lideransa munisipál tenke sai aman hodi hamahan ninia komunidade tomak bainhira hetan problema, la’ós atu halo todan liután feto maluk.
Nia hateten katak maski asuntu ne’e natureza privadu, tanba sai ona ba públiku no envolve ema inan-feto grávida ida, kazu ne’e merese hetan atensaun husi entidade kompetente sira.
“Hanesan membru GMPTL, kondena aktu ne’e, la devia sasán sira ne’e akontese. Husu ba ita-nia feto maluk ne’e, sente ladi’ak bele lori problema ne’e ba fatin aas hodi hetan justisa”, nia hateten iha Parlamentu Nasionál, ohin.
Nia mós husu ba Rede Feto atu haree kestaun ne’e ho séria no ba Ministériu Administrasaun Estatál (MAE) atu halo investigasaun.
Iha sorin seluk, Prezidente bankada CNRT, Patrocínio dos Reis Fernandes, preokupa ho atitude PAM Aileu ne’ebé utiliza logotipu partidu CNRT nian iha dokumentu relasiona ho akordu pesoál.
Tuir nia, ida-ne’e la reprezenta pozisaun partidu, tanba CNRT laiha doutrina ka regra ida ne’ebé orienta kuadru no simpatizante sira atu halo asaun ida-ne’e.
“Ne’e puramente ignoránsia pesoál, nia konxiente ka la’e utiliza sasán ne’ebé ema barak ninia atu halo akordu ba ninia pesoál”, kestiona.
Deputadu akrexenta karak partidu mós sai vítima husi hahalok hanesan ne’e, tanba bele afeta ba naran di’ak partidu nian.
“Ami lamenta, partidu iha ninia mekanizmu no regra atu orienta no foti asaun. Fiar katak lideransa superiór partidu sei halo xamada hodi haree ba kuadru sira hanesan ne’e”, nia afirma.
Patrocínio reforsa kata lideransa no servidór públika ida tenki sai fó ezemplu no hatudu komportamentu di’ak tantu iha vida públika no privada.
Jornalista: Nelson de Sousa
Editora: Maria Auxiliadora
