Juíz Antónino prefere Governu fortifika rekursu molok rekruta Juíz STJ
DILI, 20 Jullu 2026 (TATOLI)–Prezidente Asosiasaun Juíz Timor-Leste, Juíz Antónino Gonçalves, husu ba Governu atu prepara uluk rekursu Juíz sira iha Tribunál Judisiál Primeira Instánsia no Tribunál Rekursu molok halo rekrutamentu ba Juíz hala’o knaar iha Supremu Tribunál Justisa (STJ).
Nia nota, daudaun ne’e rekursu Juíz iha Timor-Leste mínimu tebes, iha de’it 30-resin, ne’ebé husi númeru ne’e Juíz na’in-haat mak nu’udar Juíz Dezembargadór ho Primeira Klase.
“Kestaun ne’ebé agora sira halo ne’e iha rua la hanesan, loke konkursu rekrutamentu Juíz ba Tribunál Rekursu no Juíz Supremu. Ida konkursu ba kuadru ba klase Juíz sira. Tenke loke lai para terseira klase tenke promove ba segunda klase depois loke tan segunda klase iha ne’ebá para ba primeira klase nune’e sira bele konkorre ba Tribunál Rekursu,” Antónino Gonçalves hateten ba jornalista sira iha ninia knaar fatin, Komisaun Nasionál Eleisaun (CNE, sigla portugés), Kolmera, Segunda ne’e.
Notísia relevante : Aban, Komisaun halo abertura aplikasaun ba Juíz STJ no TR
Nia dehan, Juíz sira ne’ebé mak atu promove ba Tribunál Rekursu ne’e nia kritériu tenke muito bom ka bom pur distinsaun.
“Kuandu ba Tribunál Rekursu ne’e bom ne’e laiha, sira ida mediokre lalika,” nia akresenta.
Prezidente Asosiasaun esplika, Juíz sira ne’ebé konkorre iha vaga Tribunál Rekursu, sira tenke serbisu nu’udar Juíz durante tinan-ualu, enkuantu ba Juíz sira ne’ebé maka konkorre iha STJ tenke iha esperiénsia tinan-10.
“Promosaun ida-ne’e la fásil tanba ein serbisu ho Ministériu Finansa atu haree ba kestaun ne’e. Tanba Juíz sira ne’ebé atu promove sira-nia saláriu tenke tuir ne’e. Ami sei iha ne’ebá ami propoin vaga ba 10 ne’e ba Primeira klase, 10 tan ba segunda klase. Ami haruka tiha hotu ba Ministériu Finansa no Ministériu Justisa mai to’o agora Ministériu Justisa seidauk fó resposta,” nia katak.
Antónino Gonçalves reforsa, daudaun ne’e buat hotu la’o di’ak, tanba ne’e STJ seidauk nesesáriu atu harii tanba fó uluk prioridade ba rekursu umanu.
“Ita hakarak hadi’a Tribunál ne’e la’ós atu harii Supremu ne’e buat hotu-hotu loos ona lae, ita-boot sira haree agora Supremu Tribunál Justisa laiha buat hotu-hotu la’o di’ak. Ita hakarak hadi’a tenke husi kiik ne’ebá mak mai leten,” nia subliña.
Jornalista : Natalino Costa
Editora : Julia Chatarina
