VIKEKE, 20 Jullu 2026 (TATOLI)—Xefe Suku Irabin de Baixo, Postu Uatukarbau, Munisípiu Vikeke, José Baptista do Carmo, informa labarik ida ho naran Febiana Madeira Pinto (7) husi Suku Irabin de Baixo lakon vida tanba lafaek tata bainhira bá hili ai iha tasi.
“Akontesimentu lafaek tata ita-nia oan Febiana ne’e akontese iha loron Kinta semana kotuk (16/07/2027), bainhira matebian ho nia bin sira hamutuk na’in-haat bá hili ai-maran besik tasi. Kala labarik hala’o iha bee ain Lawadare mak lafaek tata. Nune’e, na’in-tolu filafali bá uma fó hatene família sira buka to’o loron tulu la hetan,” José Baptista do Carmo hateten ba TATOLI iha Postu Vikeke Vila, Segunda ne’e.
Autoridade ne’e haktuir família sira buka matebian durante loron tolu la hetan nune’e iha loron Domingu (19/07/2027) tuku 10:00 Otl, família sira kontinua bá buka to’o iha bee ain Lawadare sira haree lafaek ne’e la’o iha bee laran la forsa.
“Nune’e, família sira deskonfia ona lafaek mak tata ne’ebé komunidade ho família deside kaer lafaek oho tiha, depois sira ko’a lafaek nia kabun mak haree hetan matebian nia isin-mate, maibé matebian ninia isin la kompletu, ain rua laiha, ne’ebé komunidade hasai tiha isin-mate hodi lori fila bá uma. Ohin família sira haloot ona matebian,” nia relata.
José konsidera durante ne’e lafaek sai ameasa ba komunidade nia vida tanba akontese lafaek tata abitante sira iha Postu Uatukarbau dalabarak ona, balun mate no balun kanek.
“Ita atu bandu komunidade labele ba mota no tasi, maibé ita-nia komunidade maioria moris iha vida agrikultura, entaun ita bandu labele,” nia informa.
Nune’e, nia husu Governu fó-atensaun ba balada lafaek sira-ne’ebé tata komunidade, kria programa ruma kaer tiha lafaek sira-ne’e.
“Se lae ita-nia komunidade kontinua sai vítima ba Lafaek. Tanba iha ha’u-nia suku komunidade purvolta na’in-neen mak lafaek tata mate no kanek de’it ne’e barak loos. Tan ne’e, ami sujere ba Governu kaer tiha lafaek, nune’e komunidade bele moris livre,” José tenik.
Jornalista: Vitorino Lopes da Costa
Editór: Xisto Freitas da Piedade
