Mbappé sai mellor markadór iha Kopa Mundiál 2026 ho golu 10
DILI, 20 Jullu 2026 (TATOLI)—Atakante ekipa selaun nasionál Fransa, Kylian Mbappé, sai mellór markadór iha Kopa Mundiál 2026 ho golu 10, liu golu rua (2) ba jogadór atakante Arjentina Lionel Messi ne’ebé sai mellór markadór daruak ho golu ualu (8) iha Kopa Mundiál 2026.
Entretantu, pozisaun datoluk sai mellór markadór iha Kopa Mundiál 2026 iha lista hatama golu barak-liu ne’e mak jogadór médiu Inglaterra, Jude Bellingham, ne’ebé konsege hatama golu hitu (7),ne’ebé golu hanesan ho atakante Noruega, Erling Haaland. Maibé, Bellingham mak sai terseiru lugar bazeia avaliasaun no regra husi FIFA.
Mbappe sai mellór markadór hafoin Messi la hatama tan golu ruma iha jogu finál Kopa Mundiál 2026, ho nune’e Messi hakotu jogu hirak ne’e ho golu ualu (8) no la konsege hakat liu jogadór atakante Fransa, Mbapé, idade tinan 27, ne’eb’e halibur golu 10 ne’e.
Durante Kopa Mundiál 2026 la’o ne’e, Mbappé sai hanesan jogadór prinsipál ida-ne’ebé importante iha eskema iha ekipa selesaun nasionál Fransa nian. Mbappé iha kapasidade no konsistente maske Les Bleus falla manán troféu kampiaun nian.
Ho golu 10 husi Mbappé iha Kopa Mundiál 2026 ne’e, sei hametin públiku ninia espetatiba Mbappé ninia estatutu hanesan jogadór atakante ne’ebé perigozu liu iha futeból mundiál.
Lista hosi markadór di’ak sira iha Kopa Mundiál 2026 nian la muda hafoin finál ramata ho vitória España nian hasoru Arjentina ho 1-0 tanba golu husi Ferran Torres iha tempu adisionál. Rezultadu ida-ne’e garante katak Mbappé ramata kompetisaun nu’udar vensedór sapatu Osan-Mean ho golu 10.
Ferran Torres Deside Títulu
Maski la tama iha kompetisaun markadór di’ak-liu, Ferran Torres sai hanesan figura desizivu iha finál. Nia golu iha minutu 106 fó vitória ida ba España hasoru Arjentina ho 1-0, hodi garante katak La Roja sei sai hanesan kampeaun ba Tasa Mundiál 2026 nian.
Vitória ida-ne’e hakotu España nia mehi ne’ebé hein tempu naruk (durante tinan 16 nia laran) atu foti troféu Kopa Mundiál 2026.
Iha dalan ba títulu, España halakon Fransa ho 2-0 iha meia-finál molok halakon Arjentina iha finál.
Entretantu, Lionel Messi sai nafatin hanesan jogadór ida-ne’ebé di’ak liu iha Kopa Mundiál 2026. Aleinde marka golu ualu, nia mós lidera lista fornesedór asisténsia di’ak liu ho golu haat.
Maibé, Arjentina nia derrota iha finál signifika katak Messi tenke konkorda ho ramata torneiu lahó golu seluk ka títulu markadór di’ak-liu. Maske nune’e, nia kontribuisaun sira lori nafatin Albiceleste ba finál.
Entretantu, Inglaterra termina kompetisaun iha terseiru lugar hafoin halakon Fransa ho 6-4 iha playoff ba terseiru lugar.
Ho konkluzaun finál nian, korrida ba markadór di’ak liu Tasa Mundiál 2026 nian ofisialmente hotu ona. Kylian Mbappé mantén nia pozisaun dahuluk ho golu 10, liu fali Lionel Messi, ne’ebé iha golu ualu. Entretantu, España sai hanesan kampeaun mundiál tanba vitória ki’ik ida hasoru Arjentina ho 1-0 tanba golu Ferran Torres nian iha tempu adisionál.
Jornalista : Hortêncio Sanchez
Editór : Cancio Ximenes
