TL-Vietname diskute kooperasaun bilaterál iha área dezenvolvimentu rurál no sosiál
DILI, 20 Jullu 2026 (TATOLI)—Vise-Primeiru-Ministru, Ministru Koordenadór Asuntu Sosiál, Ministru Dezenvolvimentu Rurál no Abitasaun Komunitária, Mariano Assanami Sabino, hala’o enkontru ho Reprezentante Embaixadór Vietname ho Timor-Leste, Pham Binh Dam, hodi diskute koperasaun bilaterál iha área dezenvolvimentu rurál no sosiál.
Reprezentante Embaixadór Vietname ho Timor-Leste, Pham Binh Dam, hateten ohin loron nia halo enkontru ida-ne’ebé produtivu tebes ho Vise segundu Primeiru-Ministru, no enkontru ida-ne’e akontese hafoin Vietname estabelese ona rezidénsia embaixada iha Timor-Leste.
Aleinde ne’e, nia dehan, Timor-Leste mós sai membru ASEAN no vizita Primeiru Ministru, Kay Rala Xanana Gusmão nian iha Vietname lori rezultadu di’ak no susesu boot ba membru delegasaun sira hotu husi Timor-Leste.
“Iha enkontru ohin, ami ko’alia liu kona-ba área sira-ne’ebé hola parte iha responsabilidade papel Vise-Primeiru-Ministru segundu nian,” Reprezentante Embaixadór Vietname ne’e relata ba jornalista sira iha Palásiu Governu, ohin.
Diplomata ne’e hateten, Vietname iha esperiénsia no matenek barak iha área sira-ne’e, tanba ne’e sira prontu atu fahe esperiénsia no koñesimentu hirak-ne’e ho Timor-Leste.
Tanba, nia dehan, kna’ar embaixada nian mak atu identifika prioridade sira, projetu potensiál sira, no asuntu sira-ne’ebé nasaun rua ne’e bele servisu hamutuk ba benefísiu povu no Estáladu.
Nia hatutan, inisiativa ne’e nia haree katak dezenvolvimentu agrikultura, dezenvolvimentu peska, dezenvolvimentu rekursu marítimu, no ekonomia azúl (blue economy) mak área sira ho potensiál boot tebes ba kooperasaun entre nasaun Vietname no Timor-Leste.
“Iha lorokraik ne’e, ha’u sei partisipa iha serimónia lansamentu ba ró ida-ne’ebé harii husi emprezáriu Vietname ho investimentu husi Vietname, entaun ró ne’e sei opera iha tasi ba atividade peska nian. Ida-ne’e bele sai ezemplu ida-ne’ebé bele konvida investimentu husi Vietname mai investe iha setór agrikultura no peska iha Timor-Leste,” nia esplika.
Enkuantu, nia afirma aleinde ne’e kooperasaun entre nasaun rua ne’e mós iha área edukasaun tanba hanesan área importante ida-ne’ebé ita bele dezenvolve hamutuk.
“Tanba durante vizita Primeiru-Ministru ba Vietname, ita asina ona Memorandu Entendimentu (MOU) kona-ba edukasaun no agora tempu ona atu implementa akordu ne’e. Ami bele fó apoiu ba formasaun rekursu umanu iha área sira-ne’ebé Timor-Leste presiza. Ai hein katak projetu no programa konkretu sira bele implementa lalais atu fó rezultadu prátiku no benefísiu ba nasaun rua,” nia hateten.
Jornalista : Alexandra da Costa
Editór : Cancio Ximenes
