BAUKAU, 21 Jullu 2026 (TATOLI)—Autoridade lokál hamutuk ho komunidade kolleta hare Nakroma liuhusi métodu demoplot ho totál ektare ida iha Suku Kaibada, Postu administrativu Baukau Vila, Munisípiu Vikeke.
Xefe Departementu Programa Estensaun Serbisu Munisipál Agrikultura Baukau (SMAB), Abílio Faustinho Guterres esplika, atividade kolleta hare referida nu’udár programa husi implementasaun demoplot Postu Administrativu Baukau Vila ho variedade Nakroma ne’ebé kada tinan hala’o iha suku nune’e époka tinan-ne’e iha Suku Kaibada.
“Ida-ne’e nu’udár amostra ne’ebé ektare ida kolleta totál tonelada tolu ne’ebé kompara ho tinan sira anteriór kolleta de’it tonelada ida-resin,” Abílio Guterres hateten iha Kaibada, Tersa ne’e.
Nia relata programa referida nu’udár ezemplu ne’ebé kada tinan hala’o iha postu administrativu ualu ne’ebé implementa ho sistema agrikultura moderna hanesan hahú husi prepara fatin, fila-rai, viveiru, kuda, manutensaun, kolleta to’o ramata ho rekolla iha-ne’ebé fó rezulta kada ekatare kolleta tonelada tolu.
Iha fatin hanesan, Xefe Suku Kaibada, Cosme da Costa Lopes, hateten sistema demoplot ne’e fó rezultadu pozitivu iha-ne’ebé bele motiva komunidade iha Kaibada atu implementa tuir tanba durasaun tempu badak sura husi hahú to’o ramata hamutuk fulan-tolu maibe fó rezultadu hare aumentu.
“Ida-ne’e sai ezemplu no futuru ita bele kontinua implementa inkluindu hamoris fali natar seluk ne’ebé durante ne’e abandonadu,” Cosme Lopes tenik.
Entretantu, programa demoplot ne’e implementa iha Suku Kaibada iha área natar Nunuwalitu ho totál ekatare ida, ne’ebé hala’o husi estensionista ho komunidade liuhusi serbisu hamutuk ho autoridade suku, Postu Administrativu Baukau Vila.
Jornalista: Natalino Belo
Editór: Xisto Freitas da Piedade
