BOBONARU, 21 Jullu 2026 (TATOLI) – Diresaun Munisipál Transporte no Komunikasaun (DMTK) Bobonaru, ekipa téknika husi Ministériu Transporte no Komunikasaun (MTK), no konsultór husi Banku Aziátiku Dezenvolvimentu (BAD) halo mapeamentu liuhusi utilizasaun kámara drone ba preparasaun futuru projetu konstrusaun terminál transporte públiku foun iha Maliana Vila no Tunubibi, munisípiu Bobonaru.
Atividade ne’e hala’o ona iha loron 18 Jullu 2026 ho akompañamentu husi Diretór DMTK Bobonaru, Tomás Maia, no funsionáriu sira hodi rekolla dadus tékniku no kondisaun terrenu ne’ebé sei uza ba dezeñu no planeamentu konstrusaun terminál.
“Ita halo levantamentu dadus ba terminál Tunubibi no terminál internasionál Maliana Vila. BAD sei bá tan halo levantamentu”, Tomás Maia informa ba Tatoli, tersa ne’e.
Mapeamentu ho drone importante atu asegura dadus jeográfiku no topográfiku ne’ebé presiza, nune’e prosesu planeamentu no implementasaun projetu bele la’o ho efisiente no tuir padraun tékniku.
Komunidade Maliana, Abelino Soares, fiar katak Governu sei tau prioridade hodi konstrui obra ne’e hodi organiza movimentu transporte, garante seguransa pasajeiru no redús engarrafamentu.
“Ami-nia terminál ne’e aat loos, liuliu Tunubibi, bis kuandu tama ona ne’e konjak sira hadau malu penumpang loos. Ami mai sa’e bìi mós fatin laiha, rai-rahun, ami tun-sa’e arbiru. Karreta ho motór mós halai arbiru de’it, ita halai sala karreta bele soke tan ita, tanba Tunubibi ne’e temi mak terminál más fasilidade ida laiha. Tanba ne’e, ami hakarak teminál foun ida seguru no luan”, nia dehan.
Konstrusaun terminál transporte públiku ki’ik iha Maliana Vila no terminál boot ida iha área Tunubibi ne’e hakarak hadi’a fasilidade transporte públiku no aumenta asesu mobilidade ba komunidade iha Bobonaru.
Jornalista: Sergio da Cruz
Editora: Maria Auxiliadora
