PEKIN, 21 Jullu 2026 (TATOLI)—China International Communication Group (CICG) Asia-Pacific Center, Tersa ne’e, simu delegasaun jornalista no ofisiál husi Timor-Leste (TL) iha PEKIN, Xina, iha enkontru ida-ne’ebé ho objetivu atu hametin kooperasaun iha área komunikasaun no troka esperiénsia entre mídia hosi nasaun rua.
Iha abertura enkontru, moderadór husi China Report Asosiasaun Nasaun Sudeste Aziátiku (ASEAN-sigla portugeza) hato’o bemvindu ba delegasaun Timor-Leste no hateten atividade ne’e sei ajuda hasa’e koñesimentu no hodi hametin amizade no mós liuhosi vizita ne’e bele loke oportunidade foun ba kooperasaun entre Xina no Timor-Leste.
Delegasaun Timor-Leste kompostu husi ema 24, inklui ofisiál Governu, jornalista no editor sira, ne’ebé partisipa iha semináriu profisionál iha Xina hahú 16 Jullu to’o 04 Agostu 2026. Durante programa ne’e, partisipante sira tuir palestra, estudu kazu, vizita instituisaun no atividade kultura iha PEKIN no área seluk.
Vise Prezidente CICG Asia-Pacific Center, Yuan, hateten sentru ne’e iha kompromisu atu promove kooperasaun entre Xina no nasaun sira iha rejiaun Ázia-Pasífiku, liuhosi komunikasaun internasionál no troka povu ho povu.
Nia dehan CICG la’os de’it públika revista no konteúdu kona-ba polítika, ekonomia, kultura no turizmu, maibé mós organiza programa troka esperiénsia no vizita ba delegasaun husi nasaun oioin atu hatene liután kona-ba dezenvolvimentu Xina.
Nia dehan, mídia iha papél importante hanesan ponte atu hasa’e komprensaun entre povu sira.
“Mundu presiza hatene Xina liután, no Xina mós presiza hatene mundu. Mídia tenke sai fonte entre Xina no nasaun sira seluk,” Vise Prezidente CICG Asia-Pacific Centre tenik.
Nia hatutan katak jornalista sira tenke haree no komprende realidade diretamente atubele prodús relatóriu ne’ebé loos, balansu no bele promove komprensaun entre nasaun sira.
Atividade mídia ida-ne’e mak atividade dahuluk iha programa semináriu, espera katak enkontru ne’e bele sai baze atu hametin relasaun no kooperasaun entre instituisaun mídia Xina no Timor-Leste iha futuru.
Enkuantu, Partisipante Semináriu husi Rádiu Televizaun Timor-Leste (RTTL), João Guterres, hateten liuhusi vizita ne’ebé jornalista Timor-Leste na’in 24 iha PEKIN ne’e atu hametin kooperasaun entre Povu ho Povu (P2P) no kooperasaun entre nasaun rua.
Tuir nia, haree ba kuadru kooperasaun Bealt and Road Initiative (BRI), CICG mós hanesan komponente importante ida hodi introdús dezenvolvimentu Nasaun Xina nian ba mundu, inklui promove interkámbiu internasionál iha área oioin hanesan edukasaun, komérsiu, informasaun no mídia, kultura, turizmu no seluk tan.
“Tanba ne’e, vizita referida konsidera importante atu haree no esplora kooperasaun iha futuru,” jornalista ne’e haktuir.
CICG funda iha tinan 1949, iha ona ramu hamutuk 24 iha nasaun hamutuk 14 iha mundu no rejiaun, publikasaun livru no revista sira distribui ona ba nasaun 180 iha mundu, daudaun ne’e CICG kontinua foka ba setór importante iha ASEAN-Xina.
Jornalista: Osória Marques
Editór: Xisto Freitas da Piedade
