UNE-TL aprezenta prioridade 2026 ba Prezidente Republika
DILI, 21 Jullu 2026 (TATOLI)-Uniaun Nasionál Eskuteiru Timor-Leste (UNE-TL) hasoru malu ho Prezidente Repúblika, José Ramos-Horta, hodi aprezenta programa prioridade sira UNE-TL nian ba tinan ida-ne’e.
Prezidente UNE-TL, Mariano Assanami Sabino, hateten atividade importante ne’ebé UNE-TL sei realiza iha tinan ne’e mak, hahú iha loron 27 Jullu to’o 02 Agostu 2026, sei iha atividade Jambore Munisipál ne’ebé sei realiza iha Bobonaru.
“Imi hotu hatene Eskuteiru Nasionál mobiliza foinsa’e sira, entaun Jambore Munisipál ne’e husi prioridade dahuluk mak formasaun karáter, katak karáter ida-ne’ebé disiplina haka’as an serbisu no hadomi ambiente, balada sira, nomós hadomi hanesan ninia fraternidade, umanidade no solidaridade ida-ne’e importante loos”, Mariano Assanami Sabino hateten iha Palásiu Prezidensiál, Bairu Pité, Dili, ohin.
Iha enkontru ne’e, Prezidente Repúblika mós ko’alia kona-ba situasaun sira ne’ebé daudaun hasoru hanesan El Niño ka mudansa klimátika.
Tanba ne’e, estrutura mós prepara programa balun ne’ebé liga ba mudansa klimátika no realizasaun Jambore Munisipál ne’e ho objetivu mak forma jerasaun foun ne’ebé disiplinadu, iha koñesimentu no kompaixaun, no edukasaun sívika katak partisipante sira envolve iha formasaun prátika kona-ba natureza no serbisu voluntáriu.
“Liuliu ba joven oinsá kuidadu rai, bee. Ita hein katak joven sira iha universitáriu, ita hotu hadomi eskuteiru nasionál, hamutuk sai joven ne’ebé utíl liu ba Estadu, hadomi ambiente, iha valór prinsípiu sira ne’ebé uluk ema sempre fó apoiu ita, ohin ita kuda filafali valór sira ne’e iha eskuteiru nasionál”, dehan.
Tuir nia, bainhira joven sira hamutuk hadomi ambiente, joven sira kria pás, ida-ne’e importante tebes tanba pás mak dalan úniku ne’ebé bele halo konstrusaun Estadu no seluk tan.
“Bainhira iha ona pás mak, ita bele halo dezenvolvimentu ekonomia no seluk tan bele la’o. Tanba ne’e mak iha ita-nia nasaun, depois ukun-an mós ita deklara kedas katak ita iha prosesu konstrusaun iha haat mak pás, Estadu, nasaun no karáter”, katak.
Ko’alia kona-ba Pás, Assanami reflete katak ema rihun 300 ne’ebé mate sosa liberdade, pás, dignidade, no sivilizasaun, tanba ne’e mak husi abut ida-ne’e tenke kuda fali, pás la’ós laiha konflitu, diálogu, krítika, maibé pás importante mak eziste justisa sosiál.
“Ita-nia sistema ne’ebé iha mai husi duni ita-nia fuan, katak ita hakarak kontribui ho hanoin ne’ebé saudável no hanoin di’ak ba malu, maski ita iha partidu no organizasaun oioin, maibé ita mesak timoroan”, afirma.
Iha enkontru ne’e, Prezidente Repúblika preokupa kona-ba oinsá ema hotu iha sensibilidade ba kuidadu ambiente, labele sunu rai, no seluk tan.
Jornalista: Arminda Fonseca
Editora: Maria Auxiliadora
