DILI, 22 Jullu 2026 (TATOLI)–Investigadór Komisaun Antí-Korrupasaun (CAC, sigla portugés), iha Segunda (20/07), detein kargu xefia ida ho inisiál JMdS tanba uza kupon Estadu hodi ense mina ba karreta privadu.
Bainhira CAC liuhusi Unidade Informasaun no Seguransa (UIS) hala’o operasaun fragante delitu iha área Komoro, konsege detein Funsionáriu Públiku ho inisiál JMdS nu’udar Xefe Departamentu Patrimóniu iha ministériu ida.
“Operasaun ne’e hala’o tanba suspeitu JMdS komete krime pekulatu de uzu liuhusi asaun uza señas kombustível Governu ba iha karreta privadu iha estasaun mina Aitula Fuel Komoro, Dili,” referidu nota ne’ebé Ajénsia TATOLI asesu, Kuarta ne’e.
Notísia relevante : CAC: kriminaliza funsionáriu uza veíkulu Estadu partisipa kampaña
Hafoin investigadór CAC halo prosesu identifikasaun, deside hodi halo detensaun ba suspeitu JMdS durante oras 72 iha sela detensaun CAC, Farol tamba hahalok ne’ebé komete husi suspeitu priense elementu krime ba pekulatu de uzu tuir artigu 83 Lei nú. 7/2020 kona-ba Medida Prevensaun no Kombate Korrupsaun (MPCC, sigla portugés).
Nune’e, CAC iha loron Kinta (23/07) sei prepara aktu prosesuál hodi entrega ba Ministériu Públiku no kontinua ba prosesu interrogatóriu dahuluk iha Tribunál Judisiál Primeira Instánsia Dili.
Jornalista : Natalino Costa
Editora : Julia Chatarina
