KM aprova subsídiu alimentasaun ba traballadór sira iha postu integradu fronteira-Alfándega
DILI, 22 Jullu 2026 (TATOLI)—Governu liuhusi reuniaun KOnsellu Ministru (KM) aprova projetu Dekretu-Lei kona-ba Primeira Alterasaun ba Dekretu-Lei nú. 2/2023, loron 15 fulan-Fevereiru, relasiona ho subsídiu alimentasaun ba traballadór sira-ne’ebé hala’o knaar iha Postu integradu fronteira no Alfándega nian.
Proposta ne’e aprezenta husi Vise-Ministra Finansa, Regina de Jesus, iha reuniaun KOnsellu MInistru ne’ebé hala’o iha Palásiu Governu, kuarta (22 Jullu 2026).
Alterasaun ba diploma ida-ne’e konsidera nesesidade atu atualiza valór subsídiu alimentasaun nian, hodi bele adapta montante ne’ebé simu ba realidade sirkunstánsia ne’ebé hala’o atividade no garante uniformizasaun valór subsídiu ne’e nian ba traballadór hotu-hotu iha Postu Integradu Fronteira no Alfándega nian.
Tanba ne’e, Governu deside atu hasa’e valór subsídiu husi dolar amerikanu hitu ba dolar amerikanu sanulu, liuhusi Governu aprova rejime jurídiku Konsellu Kontabilístiku Timor-Leste nian.
Iha oportunidade ne’e mós Konsellu Ministrus aprova projetu Dekretu-Lei, ne’ebé ne’ebé regula rejime jurídiku organizasaun, kompeténsia no funsionamentu Konsellu Kontabilístiku Timor-Leste nian.
Diploma ne’e regula funsionamentu husi órgaun tékniku independente ida-ne’e, ne’ebé kria iha Ministériu Finansa nia laran, ho misaun atu prepara norma kontabilidade nian, fó sai paresér no rekomendasaun sira.
Nomós promove adosaun prosedimentu kontabilidade ne’ebé uniforme no armonizadu ho Norma Internasionál sira Kontabilidade nian, atu nune’e bele hasa’e kualidade informasaun finanseira husi entidade sir- ne’ebé inklui iha sistema nasionál kontabilidade nian.
Importante atu hanoin katak konsellu kontabilístiku Timor-Leste kria tiha ona liuhusi Dekretu-Lei nú. 45/2025, loron 15 fulan-Dezembru, nu’udar organizmu tékniku independente ida-ne’ebé iha autonomia téknika no administrativa, ne’ebé funsiona iha ministériu nia laran ho responsabilidade sira iha área finansas públikas nian.
Jornalista : Alexandra da Costa
Editór : Cancio Ximenes
