BAUKAU, 22 Jullu 2026 (TATOLI)—Projetu reabilitasaun estrada urbana pakote rua kompostu husi pakote dahuluk no datoluk iha Munisípiu Baukau to’o fulan-Jullu ne’e atinje ona pursentu 20-resin.
Koordenadór Tékniku Obra Públika Destakadu Munisípiu Baukau, Diego Cipriano Caleza, esplika projetu estrada urbana iha Baukau atualmente sei kontinua hela iha faze implementasaun no progresu di’ak mezmu presiza kontrola liuhusi sistema mutual check more hanesan haree dezeñu hodi sinkroniza iha terrenu liuliu fasilidade komplementár sira kompostu drenajen, elevasaun bee no morru protesaun.
“Bainhira ita haree iha terrenu, projetu iha prosesu di’ak hanesan iha pakote dahuluk posibilidade la kle’ur bele aspál ona hafoin base cost, tanba pursentu boot maibé serbisu lais,” Diogo Caleza informa ba TATOLI iha ninia kna’ar fatin, Kuarta ne’e.
Caleza relata projetu pakote dahuluk husi área Nagardjo to’o Ospitál Rejionál Eduardo Ximenes (HoREX-sigla portugeza) atualmente atinje ona pursentu 20-resin iha-ne’ebé iha ona faze serbisu kamada sabies ne’ebé hafoin asina termu aseitasaun entre Governu ho komunidade afetada presiza tempu atu halo alargamentu.
Aleinde ne’e, pakote III atinje ona pursentu 14 iha-ne’ebé hala’o serbisu hada morru protesaun no monta index no foin iha faze publikasaun lista afetada nune’e presiza mós tempu atu komunidade sobu uma.
“Presiza lori tempu atu ita check didi’ak ho detallu nune’e labele fó impaktu ba empreza no Estadu,” Caleza akresenta.
Tuir levantamentu dadus husi ekipa konjunta lideradu husi Ministériu Obra Públika (MOP), identifika uma hamutuk 55 mak afetadu kompostu husi estrada pakote dahuluk diresaun Nagardjo to’o rotunda Vila Nova hamutuk uma 24 no pakote datoluk totál uma ne’ebé afetadu hamutuk 31.
Entretantu, estrada urbana iha Baukau vila oras ne’e iha faze implementasaun ho totál kilómetru 23 responsabiliza husi Kompañia JOVA Construction Unipessoal, Lda, responsabiliza pakote dahuluk ho valór orsamentu $4.735.021,55 no pakote daruak responsabiliza husi Kompañia Vage’e Unipessoa, Lda, ho valór orsamentu $3.768.933,21 ho durasaun serbisu tinan-rua.
Jornalista: Natalino Belo
Editór: Xisto Freitas da Piedade
