DILI, 23 Jullu 2026 (TATOLI)—Instituisaun Defeza Direitu Labarik ka Instituto para a Defesa dos Direitos da Criança (INDDICA) kontinua halo monitorizasaun regulár ba atividade traballadór infantil iha Kapitál Dili, tanba konsidera hanesan krime organizadu ne’ebé kontra direitu labarik nian.
Notísia Relevante: KNDL Rejistu Labarik Hamutuk 200-Resin Ne’ebé Mak Kontinua Faan Sasan Iha Dili
Prezidente Instituto para a Defesa dos Direitos da Criança (INDDICA), Dinorah Granadeiro, hateten durante ne’e entidade hotu sempre ko’alia kona-ba labarik kiik sira-ne’ebé faan sasán iha dalan ninin (traballadór infantíl) ne’ebé lei bandu.
“Iha asaun lubuk ida mak ami halo ona, hanesan halo aproximasaun ba família, sensibilizasaun kona-ba protesaun labarik (direitu labarik), subsídiu ba sira hodi loke negósiu iha uma,halo reintegrasaun fali labarik sira ba idaidak nia hela fatin no konsege hatama sira ba eskola. Maibé esforsu sira-ne’e kontinua laiha rezultadu tamba ne’e ami foti medida preventiva seluk mak prosesa tuir dalan legál,” Prezidente INDDICA hateten ba Agência Tatoli iha nia kna’ar fatin, Kaikoli, ohin.
Nia dehan, maske iha sosiedade balun ladun satisfas ho sira-nia asaun ne’e maibé ida-ne’e obrigatória ne’ebé INDDICA tenke halo hodi promove direitu labarik no hapara traballu infánsia.
“Entaun, ami sempre halo monitorizasaun regulár hahú husi dadeer to’o kalan, ne’ebé kompostu husi ekipa konjunta INDDICA, MSSI, OPL no PNTL no BOP,” nia hateten.
Durante monitorizasaun INDDICA konsege identifika labarik lubuk ida iha estrada protokulu Timor Plaza nia oin, jardin Motael, Fatuhada, Merkadu Komoro, Kristu Rei no fatin sira-ne’ebé baibain labarik kiik-oan sira faan sasán ba.
Aleinde ne’e, sira mós bandu labarik sira faan sasán iha uma oin (trotoar leten) hanesan sigaru no alkol sira, tanba ne’e bele estraga sira-nia koñesimentu.
“Bainhira ami hetan sira, ami lori ba eskuadra PNTL nian hodi prosesa tuir lei, labarik sira lahetan kondena maibé inan-aman no patraun sira mak ami kondena. Hanesan foin ddaauk ami kaer labarik na’in-rua iha Tasi-Tolu lori ba eskuadra Dom Aleixo no ninia patraun tama sela (komarka) durante oras 72. Hafoin sai, ami halo akordu no haruka nia reintegra kedas labarik sira-ne’e ba Oekusi,” nia dehan.
Sira deteta katak razaun fundamentál ba traballa infánsia iha fatór hanesan ekonomia no interrese privadu, dalaruma sira mak gosta halai tuir sira-nia kolega seluk ba faan ne’e.
Nune’e, nia aumenta katak bainhira asaun krime organizadu ne’e kontinua la’o sira sei prosesa tuir dalan legál ba lei kontra direitu labarik nian, entaun pena prizasaun depende ba asaun ne’ebé nia halo grave ka l’e, depende ba desizaun husi parte relevante hanesan Ministériu Públiku no Tribunál Rekursu.
“Tanba ne’e, husu ba inan-aman sira labele abandona ita-nia oan, maske fatór ekonomia la sufisiente maibé nafatin proteje labarik sira no garante sira-nia direitu tuir konstituisaun RDTL,” nia apela.
Entretantu, husi Janeiru to’o Jullu 2026, INDDICA identifika labarik sira-ne’ebe kontinua faan sasán iha dalan ninin hamutuk 29, hahú husi idade 7 to’o 16 no barak-liu mai husi munisípiu Oekusi, Aileu, Baukau, Bobonaru, Ermera, Víkeke no Dili, no entre sira-ne’e iha balun eskola no balun la eskola.
Notísia Relevante: INDDICA prepara $15.000 fasilita família labarik ne’ebé fa’an sasán iha dalan públiku
Jornalista : Alexandra da Costa
Editór : Cancio Ximenes
