Kandidatu 2.086 partisipa teste eletróniku ba vaga AA no AT
DILI, 23 Jullu 2026 (TATOLI)-Komisaun Funsaun Públika (KFP) no Ministériu Finansa (MF) realiza ezame eskrita eletrónika ba kandidatu hamutuk 2.086, ne’ebé kompete ba vaga iha Autoridade Aduaneira (AA) no Autoridade Tributária (AT).
Abertura teste ne’e hala’o iha edifísiu KFP, Matadouru, no loke ofisialmente husi Ministra Finansa, Santina Cardoso, Prezidente Komisaun Funsaun Públika, Agostinho Letêncio de Deus no akompaña husi ekipa júri sira.
Teste ne’e realiza ohin to’o iha 29 Jullu no kada loron iha turnu rua to’o tolu mak partisipa, ne’ebé kada turnu iha ema na’in-150-resin.
Kandidatu sira ne’e kompete ba vaga iha grau C, D no E atu prienxe ba númeru vaga hamutuk 160, ne’ebé husi AA iha 80 no AT iha 80.
Iha teste loron dahuluk, iha parte dadeer, loloos iha kandidatu na’in-151, maibé 39 la partisipa no turnu loraik parema na’in-150, kandidatu hirak ne’e aplika ba vaga grau C iha AA.
Ministra Santina Cardoso, hatete teste ne’ebé ministériu no KFP hala’o ho mekanizmu sira tuir padraun ne’ebé iha no profisionál. Ezame ne’e ezije kandidatu sira uza teknólojia hodi promove liután transparénsia no akuntabilidade.
Nia husu ba kandidatu sira atu iha integridade aas no responsabilidade ba teste ne’e, tanba vaga ne’e anunsia ona iha tinan kotuk no iha ema rihun 10-resin mak konkorre, maibé iha selesaun dokumentu 2.086 mak admitidu hodi tuir teste eskrita.
“Se ita-boot sira pasa, orgullu mós ba imi ba preparasaun ne’ebé halo”, nia dehan.
Teste ne’e iha faze eliminatória, tanba kandidatu ho valór 60 ba leten pasa automatikamente pasa hodi hein tuir fali faze prova ikus ba intervista.
Durante teste eskrita eletrónika ho durasaun oras rua, matéria sira liga ho área ne’ebé kandidatu sira konkorre no Funsaun Públika nian. Hafoin ramata teste rona kedas rezultadu.
Ministra hateten katak mekanizmu teste entervista mak sei iha gravasaun no foku ba área ne’ebé kandidatu sira aplika no koñesimentu espesífiku hodi mantein prosesu transparénsia.
Prezidente Komisaun Funsaun Públika, Agostinho Letêncio de Deus, garante katak teste ida-ne’e totalmente transparante no la depende ba ekipa júri, maibé depende ba kandidatu idaidak, tanba ne’e ezije duni ema nia kuiñesimentu, preparasaun no prontidaun atu serbisu.
“Ita-boot sira iha nia sorin mós la halo buat ida, tanba husi komputadór ida ba komputadór seluk pergunta ne’e diferente”, nia dehan.
Mekanizmu teste ne’ebé implementa ne’e atu hasees husi buat ne’ebé durante ne’e hamosu krítika hanesan bele partidarizasaun, sukuizmu no grupu.
Jornalista: Nelson de Sousa
Editora: Maria Auxiliadora
