DILI, 23 Julu 2026 (TATOLI)-Ministra Finansa, Santina Cardoso, informa katak Ministériu Finansa (MF) sei halo diseminasaun ba esbozu Lei Impostu sobre Valór Akrexentadu (IVA) hodi rona opiniaun públika molok lori bá Konsellu Ministru atu hetan aprovasaun no depois halo submisaun ba Parlamentu Nasionál.
“Ministériu Finansa haree ba instituisaun lubun ida no esbozu Lei IVA antes ne’e iha ona no halo ona revizaun. Agora, ami prepara hela atu iha Agostu ou Setembru halo semináriu ida hamutuk ho Parlamentu, haree iha posibilidade ba diseminasaun”, ministra hateten ba Tatoli iha edifísiu Komisaun Funsaun Públika, Matadouru, Dili, ohin.
Tuir nia, objetivu husi diseminasaun ne’e mak atu asegura katak ema hothotu komprende didi’ak konteúdu lei nian no impaktu ne’ebé bele mosu bainhira implementa.
“Lei IVA ne’e la’ós Governu de’it mak prepara. Ita-nia tax paid ne’ebé ikus lei ne’e sei afeta ba sira [nune’e], sira mós tenke iha mekanizmu sistema ida ba implementa”, nia dehan.
Kestiona kona-ba kalendáriu atu aprezenta ezbosu lei ba Konsellu Ministru, governante ne’e hateten prioridade mak halo uluk desiminasaun públika. Depoizde rona opiniaun husi parte relevante sira, hafoin lori proposta ne’e ba lori ba Konsellu Ministru atu aprova antes submete ba Parlamentu Nasionál.
Antes ne’e, Prezidente Komisaun C trata Asuntu Finansa Públika iha Parlamentu Nasionál, Cedelízia Faria dos Santos, hateten katak Komisaun hakarak prioriza diskusaun ba IVA iha tinan ne’e.
Nia dehan lei ne’e iha prosesu preparasaun no Komisaun C halo hela koordenasaun ho Ministériu Finansa.
“Tuir projesaun, iha 2027 mak [Ministériu Finansa] bele lori mai, maibé ami Komisaun ladún konkorda ida-ne’e, tanba ita tama ona ASEAN tenke haree”, nia afirma foin lalais ne’e.
Governu kontinua prepara Autoridade Tributária no Aduaneira atu administra lei IVA iha tinan 2027 hanesan parte ida prinsipál ba mobilizasaun reseita doméstika ne’ebé espera atu kontribui 1,5% husi Produtu Internu Brutu (PIB).
Jornalista: Nelson de Sousa
Editora: Maria Auxiliadora
