DILI, 23 Jullu 2026 (TATOLI)—Institutu ba Defeza Direitu Labarik ka Instituto para a Defesa dos Direitos da Criança (INDDICA) ezekuta ona Orsamentu Jerál Estadu (OJE) 2026, hahú husi Janeiru to’o Jullu 2026 ne’e hamutuk 42%.
“Ami-nia ezekusaun tarde ne’e iha prosesu konstrusaun ba edifisiu foin INDICCA nian de’it, maibé programa seluk sira implementa ona durante ne’e,” Prezidente Instituto para a Defesa dos Direitos da Criança (INDDICA), Dinorah Granadeiro, informa ba Agência Tatoli iha nia kna’ar fatin, Kaikoli, ohin.
Ezekusaun ne’e liuhusi atividade sira hanesan sensibilizasaun kona-ba protesaun no direitu labarik sira-nian ba iha munisípiu sira, halo monitorizasaun ba planu asaun nasionál ba labarik, halo sensibilizasaun mós kona-ba maneira pesoál saúde sira halo tratamentu ba labarik, koordenasaun ho PAM atu haree kona-ba menu merenda eskolár.
“Tanba merenda eskolár sei integra no prevee orsamentu ba PAM sira mak jere, entaun Ministériu Edukasaun la renponsavel ona. Tanba ne’e mak ita halo koordenasaun ho PAM sira hodi garante nafatin aihan saudavel iha menu merenda eskolár,” nia dehan.
Entretantu, Orsamentu Jeral Estadu (OJE) 2026 ne’ebé Governu prevee ba INDDICA hamutuk rihun $851-resim, ne’ebé kompostu husi saláriu vensimentu $256, beins servisu $429, transferénsia públikas $15 no kapitál dezenvolvimentu $150.
Jornalista : Alexandra da Costa
Editór : Cancio Ximenes
