OEKUSI, 23 Jullu 2026 (TATOLI) – Ekipa Sekretariadu Tékniku Administrasaun Eleitorál (STAE) Rejiaun Administrativa Espesiál Oekusi Ambeno (RAEOA), rejista ona eleitór na’in-18.702 ne’ebé atualiza kartaun eleitorál ba Resenseamentu Eleitorál Atualizasaun Baze Dadus (REABD) ho baze sistema biométriku, no sei falta ema na’in-40.567.
“Eleitór eziste iha semi sistema semi-biométriku 56.449, sira-ne’ebé atualizadu ona iha sistema biométriku 18.708 mai husi rejista foun 2.228 no sira-ne’ebé tuan ka troka de’it 15.882, seidauk atualizadu ba sistema biométriku 40.567,” Diretór STAE Oekusi, Gregorio Neno, hateten ba Ajénsia TATOLI, I.P., iha Oekusi, ohin.
Notísia relevante:MAE lansa REABD ho baze sistema biométriku iha Oé-Cusse
Nia informa katak, antes ne’e, molok halo resenseamentu eleitorál, parte STAE halo uluk sensibilizasaun iha nível postu administrativu sira inklui enkontru komunitáriu iha nível suku, atu partilla informasaun ba komunidade kona-ba atualizasaun kartaun eleitorál ba sistema biométriku.
Maibé, nia dehan katak durante ne’e parte STAE infrenta difikuldade liliu iha atendimentu ne’ebé dalaruma adianta tanba depende ba sistema rejístu online, entaun presiza liña internet ho asesu ne’ebé di’ak. Sura mós katak atu halo impressaun ba kartaun biométriku sei enkamiña ba nasionál, nune’e presiza tempu semana rua to’o tolu maka foin bele halo impressaun iha munisípiu.
“Kuandu liña internet falla, bele to’o fulan ida maka ami foin bele halo imprime, satán atu halo rejista ka imprime iha nivél suku, tanba serbisu ne’e online,” nia hateten.
Nia esplika katak rekezitu ne’ebé STAE presiza atu halo resenseamentu kartaun eleitorál ba sistema biométriku ne’e ho dokumentu prinsipál rua de’it, ne’e maka Sertidaun RDTL no Billete Identidade (BI).
Atendimentu móvel
Iha fatin hanesan, Xefe Suku Bobokase, Tomas Nessi, rekomenda ba parte STAE atu halo tratamentu móvel ba suku sira, nune’e bele hakbesik atendimentu ba eleitór sira iha baze.
“Nu’udar autoridade lokál, ami konsege fahe ona informasaun ba iha suku maibé balu labale tun mai vila ho razaun la’o labele no balu distansiado’ok husi vila entaun difikulta mós tanba osan selu transporte, tanba ne’e ami rekomenda sei bele halo atendimentu movel, konsentra iha kada suku, nune’e sira-ne’ebé la’o labele, sira bele trata de’it suku, tanba eleisaun ne’e besik ona iha 2027, tanba barak maka seidauk atualizadu ba sistema biométriku,” nia hateten.
Jornalista: Abílio Elo Nini
Editór: Rafael Ximenes de A. Belo
