Xanana relata Governu aprova dekretu-lei kona-ba lei sibernétika ba Xefe Estadu
DILI, 23 Jullu 2026 (TATOLI)—Primeiru-Ministru, Kay Rala Xanana Gusmão, kinta ne’e, relata servisu Governu nian durante ne’e liuliu kona-ba lei sibernétika ba Xefe Estadu, José Ramos-Horta.
“Ha’u informa ba Prezidente ha’u servisu hela ho instituisaun importante hanesan SEATOU no mós kona-ba jogu online karik imi mós akompaña. Horisehik iha Konsellu Ministru aprova lei ida ne’ebé atu haruka ba Parlamentu Nasionál atu aprova no fó kbiit halo dekretu-lei kona-ba lei sibernétika nian, tanba iha mundu ne’e agora problema boot,” PM Xanana hatene hafoin remata enkontru ho Xefe Estadu iha Palásiu Prezidensiál Nicolau Lobato, Bairru Pite.
Nia dehan, tuir relatóriu husi Organizasaun Nasaun Unida (ONU) nian katak Timor-Leste mós tama iha laran.
“Iha relatóriu ONU nian hoirsehik ha’u simu kona-ba krime sibernétika iha Sudeste Aziátiku iha Timor mós tama iha laran. Ne’ebé, ha’u-nia liafuan mak ne’e de’it tanba toleransia zero, ami sei hakaas aan nafatin relasaun kooperasaun ho nasaun iha ASEAN nian hidi haree kona-ba asuntu ne’e,” nia dehan.
Primeiru-Ministru hatutan xines sira mai mós sira-ne’e ema duni husi Kamboja mak sira halai mai Timor-Leste, entauniha enkontru ho Embaixada Xina, ko’alia ona tenke toleransia zero.
“Ita la lakon osan ba ne’ebá ida, maibe sira joga ita-nia naran mak sei sai foer. Ne’eduni, ida-ne’e mak ha’u informa ba Prezidente,” nia dehan.
Iha parte seluk, Xanana hateten, nia mós ba halo abertura ba formasaun tékniku ne’ebé mai husi Munisipiu kona-ba projetu PDIM no PNDS tanba projetu barak mak atrazadu.
“Ohin, iha Delta Nova, ha’u mós loke atividade treinamentu ba tékniku sira iha kada Munisipiu kona-ba projetu PDIM ho PNDS ne’ebé la’o di’ak. Tanba, instituisaun sira la’o iha fatin barak hare’e dehan projetu balun iha 2019-2021 seidauk la’o no husik hela,” Xanana dehan.
Nia afirma, durante iha abertura husu ona ba Prezidente Autoridade Munisipiu sira kona-ba preparasaun ba Governu lokál ne’e iha setór rekursu umanu no setór hotu tenke aselera lalais.
Jornalista : Hortêncio Sanchez
Editór : Cancio Ximenes
