AMD sei palika sansaun administrative ba otél no loja ne’ebé la mantein ambiente moos
DÍLI, 24 Jullu 2026 (TATOLI) – Autoridade Munisipál Dili (AMD) sei aplika sansaun administrative ba otél, loja no establisementu komersiál sira-ne’ebé la halo limpeza iha sira-nia área negósiu hodi kumpre ba Sirkulár n.º 002/PAM Dili/VII/2026.
Tuir sirkulár ne’ebé fó sai husi AMD, entidade komersiál hotu-hotu iha obrigasaun atu halo limpeza iha passeiu, área estasionamentu no fatin atividade negósiu, hodi garante ambiente ne’ebé moos no livre husi lixu.
Prezidente Autoridade Munisípiu Díli, Francisco dos Santos hateten proprietáriu ka entidade ne’ebé la kumpre sei konsidera hanesan violadór ba Dekretu-Lei n.º 3/2024 kona-ba Igiene no Ordem Públika. Nune’e, Autoridade Munisipál Dili sei aplika koima administrativa no medida korretiva tuir dispozisaun legal ne’ebé vigora.
“Tuir sirkulár ida-ne’e, koima ba ema individuál varia husi US$5 to’o US$500. Enkuantu ba ema koletiva, inklui loja, hotel no kompanhia sira, koima varia husi US$10 to’o US$1.000, depende ba tipu no gravidade violasaun,” Francisco dos Santos dehan ba jornalista sira iha Matadouru, Dili.
Dos Santos husu ba emprezáriu no proprietáriu establisementu komersiál sira atu kolabora no apoia kampaña nasionál ho tema “Mai Ita Hamutuk ba Díli Hakmatek, Moos no Furak”, hodi hametin iigiene públika no hadi’a imajen kapitál Díli.
Jornalista: Camilio de Sousa
Editór: Filomeno Martins
